Milani u ndal në barazim 1-1 në Parma, duke rrezikuar shumë për të siguruar një vend në zonën Champions.

Castillejo shënoi për kuqezinjtë, ndërsa Bruno Alves barazoi shifrat me një goditje të bukur dënimi, transmeton telesport.

Në fund të ndeshjes trajneri Gennaro Gattuso u ndal të analizojë ndeshjen, ku theksoi se, “Në pjesën e parë luajtëm me ritëm, nuk ishte një paraqitje shumë e mirë. Më pas provuam dhe patëm fat kur gjetëm golin e avantazhit, më pas ata barazuan me një goditje dënimi të bukur, por të shkaktuar nga naiviteti ynë”.

Ai tha se Parma në disa momente ishte shumë e rrezikshme.

“Ky ekip ka karakteristika shumë specifike, ishim në dijeni për këto në disa momente ishin më të rrezikshëm se ne”, u shpreh Gattuso.

Gattuso thotë se kishte pritur ndeshje të vështirë, megjithatë priste diçka më tepër nga ekipi i tij.

“Ndoshta nuk jam i zoti që t’i bëj njerëzit të kuptojnë këto gjëra të vogla. Ne prisnim diçka më shumë, e dinim shkallën e vështirësisë së kundërshtarit. Tek goli i dytë ishim të pafat, nuk ishte shumë i paqartë pozicioni jashtë loje, duhet të shohim përpara”, u shpreh Gattuso