Përzgjedhësi i Kombëtares së Kosovës në futboll, Alan Giresse, ka mbajtur konferencë për medie në nismë të grumbullimit për dy ndeshjet kualifikuese për Euro 2024 kundër Izraelit dhe Andorrës, raporton Ekonomia Online.

“Dardanët” do ta nisin ciklin kualifikues me ndeshjen e parë kundër Izraelit në udhëtim më 25 mars, ndërkaq tri ditë më vonë luajnë në Prishtinë kundër Andorrës.

Trajneri i Kombëtares së Kosovës, Alain Giresse është shprehur optimist para kampanjës kualifikuese.

“Jemi këtu para këtyre lojëve në kuadër të kësaj kampanje të re. Përgjithësisht ndodhemi në një grup që nuk është i vështirë, por që nuk duhet nënçmuar dhe është një grup që na dhuron ambicie për të vazhduar. Kjo është pikëpamja ime ndaj grupit. Do ta prezantoj listën që është e njohur dhe në krahasim më listën janë dy ndryshime.”

Giresse ka treguar se Uran Bislimi nuk është më në listën e kombëtares, teksa në të janë 25 lojtarë. Ai foli edhe rreth ftesës për futbollistin e Cluj, Ermal Krasniqi. Tha se Krasniqi gjendet në paralistë.

“Sa i përket Uran Bislimit, në vend të tij, e kemi Blendi Idrizin dhe aktualisht listën tonë e përbejnë 25 lojtarë. Elbasan Rashani nuk është grumbulluar për shkak të dëmtimit. Te Elbasan Rashani nuk do të ketë ndryshime”.

“Ermal Krasniqi bën pjesë në paralistë, dhe mbetet të shihet. Por me vonë do të shohim pasi ka lojtarë që nuk po ndihen mirë Arbnor Muja, është njëri nga ta që nuk po ndihet mirë”, – theksoi ai.

E menaxheri i kombëtares, Bajram Shala, tha se Bislimi e ka refuzuar sërish Kosovën, derisa Berishën e kanë pritur katër vjet.

“Uran Bislimi ka qenë në listë, e ka konfirmuar ardhjen, edhe për herë të dytë Uran Bislimi e ka refuzuar Kosovën, edhe besoj që është hera e fundit që ka pasur mundësi me e refuzu Kosovën. E ka puthur fanellën e Kosovës kur ka dhënë gol, dhe nuk e ka refuzuar, por e ka refuzuar përmes klubit, nuk ka pasur guxim që ai të vijë. Edhe pasi e ka konfirmuar edhe e ka rezervuar biletën, ai për herë të dytë ka refuzuar Kosovën. Nga sot, Kosova nuk është me opsion për Uran Bislimin”, tha ai.

“Mërgim Berishës i kemi ofruar gjithçka, deri në detajet e fundit. Berishën e kemi pritur katër vjet e gjysmë, madje në tetor të vitit 2019 sa ka qenë pjesë e Salzburg, ai ka konfirmuar ardhjen e tij te Kosova” , tha Shala.

Uran Bislimi luan për FC Lugano, si mesfushor qendror, ndërsa Berisha së fundmi e ka zgjedhur Gjermaninë për ta përfaqësuar.

Kosova është në Grupin I së bashku me Zvicrën, Izraelin, Rumaninë, Bjellorusinë dhe Andorrën.