Njëmbëdhjetë vjet e gjashtë muaj janë bërë qëkur A.B. ka dorëzuar padi në Gjykatën Komunale të Prishtinës rreth ndarjes së një shume parash me ish-bashkëshorten B.B.

Prej vitit 2006 e deri më 2014 rasti është rigjykuar dy herë. Tani, këtë vit, ka filluar gjykimi për të tretën herë.

Herën e parë, sipas dosjes që e posedon “Koha Ditore”, gjykata e shkallës së parë i ka dhënë të drejtë gruas, kurse herën e dytë burrit. Të dyja herët Gjykata e Apelit i ka kthyer në rigjykim për shkak të mungesës së provave dhe mosvërtetimit të gjendjes faktike.

Zvarritja e këtij rasti për vite të tëra jo vetëm u ka shkaktuar dëm financiar, por ka ndikuar negativisht edhe në raportet familjare, duke pasur parasysh se ish-bashkëshortët kanë dy fëmijë nga martesa e tyre..