Kryetari i AAK-së, Ramush Haradinaj, ka kujtuar në tre vjetorin e vdekjes Bajram Rexhepin.

Haradinaj ka thënë se Rexhepi iu përgjigj thirrjes së atdheut, e mbeti në histori si një prej mjekëve të parë të Ushtrisë Çlirimtare të Kosovës.

“Ai pati guximin të merrte përgjegjësi në rrethana aspak të lehta, kur vendi i sapo dalë nga lufta po përballej me sfida të shumta, veçanërisht në ndërtimin e institucioneve të para demokratike”.

“Si personalitet, u shqua për fisnikërinë, përkushtimin e profesionalizmin e tij. Nuk do e kujtojmë vetëm si kryeministër, por si një shqiptar të madh, kontribues për liri dhe ndërtues i paqes në vend”, ka shkruar Haradinaj në rrjetin social Facebook.