Kandidati për kryeministër, Ramush Haradinaj, nga koalicioni PDK, AAK, Nisma, ka thënë se besimin që ka arritur ta marrë nga qytetarët dhe subjektet politike do ta përdorë për të mirën e vendit.

Kreu i AAK-së ishte pjesëmarrës në një tubim në fshatin Jabllanicë të komunës së Gjakovës, ku janë janë përkujtuar 33 dëshmorët e kësaj ane.

”Besimi që kam marrë nga qytetarët dhe disa subjekte politike do ta përdor për të mirën e vendit dhe jo për interesat politike të partisë”, u shpreh Haradinaj.

Më pas, Haradinaj foli edhe për temat e ndjeshme aktuale në vend – Demarkacionin deh formimin e Asociacionit të Komunave Serbe, për çka kishin pasur përplasje të mëdha me partnerin e ri të koalicionit.

Ai ka siguruar se nuk do të ndryshojë mendim për kufirin dhe ASK-në. Ai tha se kufiri i Kosovës është na Çakorr, ndërsa nuk do të ketë vend për Asociacion e as për Serbi në Kosovë.

”Kosova është e vogël nuk ka vend për Asociacion, kufiri i Kosovës është në Çakorr, në Kosovë nuk ka vend për jug e për veri, në Kosovë nuk do të ketë vend për Serbinë”, ka thënë Haradinaj.

Në këtë tubim ka marrë pjesë dhe kreu i PDK-së, Kadri Veseli, partneri i ri i Haradinajt. Në fillim të fjalës së tij, Veseli ka përshëndetur Haradinajn, të cilin e quajti kryeministër i Kosovës.

“Me vjen mire qe është këtu dhe e përshëndesë atë që është nip i Shqiponjës, kryeministrin Ramush Haradinaj”, ka thënë Veseli.

Veseli, i cili do të jetë bartës i Listës PDK-AAK-Nisma, dhe kandidati për kryeministër, Haradinaj, janë ulur pranë njëri-tjetrit dhe janë parë teksa bisedojnë kokë më kokë.