Kryeministri në detyrë i Republikës së Kosovës, Ramush Haradinaj, priti në takim lamtumirës ambasadorin e Italisë, Piero Cristoforo Sardi, të cilin e falënderoi për kontributin e dhënë gjatë misionit të tij në Kosovë, në fuqizimin e raporteve diplomatike ndërmjet dy shteteve, përcjell Ekonomia Online.

Haradinaj, e njoftoi ambasadorin Sardi për zhvillimet e përgjithshme në vend, duke theksuar përkushtimin e institucioneve të Kosovës për avancimin e raporteve bilaterale, në fusha të interesit reciprok.

Duke vlerësuar rolin e Italisë në periudhat e shtetndërtimit, kryeministri në detyrë Haradinaj, falënderoi ambasadorin Sardi për gjithë përkrahjen që Italia ka dhënë në të gjitha etapat në Kosovë, duke theksuar se kjo përkrahje duhet të vazhdojë edhe në të ardhmen në proceset jetike për vendin, liberalizimin e vizave, por edhe për anëtarësimin e Kosovës në BE dhe në NATO.

“Jemi mirënjohës për gjithë angazhimin tuaj dhe të Italisë në përkrahje të proceseve të rëndësishme politike për vendin tonë, duke synuar që ky bashkëpunim të avancojë edhe në fushën e zhvillimit ekonomik”, tha kryeministri në detyrë Haradinaj, duke theksuar kontributin e veçantë që Italia ka dhënë dhe vazhdon të jap në fushën e sigurisë, në kuadër të forcave paqeruajtëse të KFOR-it.

Ambasadori në largim Piero Cristoforo Sardi, falënderoi kryeministrin në detyrë Haradinaj për pritje dhe për bashkëpunimin e deritanishëm.