Kryeministri i Kosovës, Ramush Haradinaj, ka kujtuar 20 vjetorin e masakrës së Belegut, dhe martirët që u vranë gjatë luftës në tërë Kosovën.

“E vërteta jonë janë varret masive në tërë Kosovën. Liria e atdheut tonë mban emrin e secilit nga martirët e Belegut dhe tërë Kosovës. Duke qenë se shumica e të vrarëve në Beleg konsiderohen të zhdukur të luftës kjo masakër e ka edhe dimensionin e saj më të dhimbshëm, sepse shumica nga 46 të ekzekutuarit nuk e kanë ende një varr të shënjuar në këtë tokë, për të cilën ata janë sakrifikuar”, ka shkruar Haradinaj në Facebook.

Ai gjithashtu ka thënë se nuk do të ndalen deri të gjinden eshtrat e të vrarëve gjatë luftës.

“Sot, njëzet vjet më vonë, ne e vazhdojmë betejën për zbardhjen e fatit të të gjithë martirëve dhe nuk do të ndalemi deri sa të gjenden eshtrat e secilit njeri të Kosovës, të vrarë në luftë”, ka përfunduar Haradinaj.