Ish-kryeministri Ramush Haradinaj ka thënë se Kosova me pranimin e planit franko-gjerman i ndal qëllimet ruse në Ballkan për destabilizim.

Ai tha se për këtë, të hënën, kur është edhe takimi i nivelit të lartë mes kryeministrit Kuti dhe presidentit serb Vuçiq, duhet të mbyllet marrëveshja, raporton Ekonomia Online.

Ai ka shtuar se Rusia është i vetmi shtet që nuk i gëzohet arritjes së marrëveshjes, dhe se sipas tij, Kosova mund ta mbyllë tërësisht marrëveshjen që të hënën.

“Çka mund të bëjmë ne për ta zmbrapsë agjendën ruse në Ballkan? Ne mund të ndihmojmë koalicionin global kundër Rusisë edhe me veprimet tona. Kemi folur për planin franko-gjerman, dhe pse Kosova me pranimin e këtij plani ec përpara në planin e sigurisë. I vetmi vend në botë që nuk i gëzohet arritjes marrëveshjes Kosovë-Serbi është Rusia. Si mund të veprojë Kosova është se mundet të hënën ta mbyllë marrëveshjen, jo vetëm të japë sinjale pozitive, por ta mbyllë marrëveshjen”, ka thënë ai.

Haradinaj deklaroi se Qeveria duhet t’i kërkojë ndërkombëtarëve edhe ndihmë financiare për veriun.

“Qeveria duhet t’i kërkojë Amerikës dhe Evropës edhe ndihmë financiare edhe investime për të zbatuar më tutje rendin ligjin dhe zhvillimin ekonomik në veri të Kosovës. Mendoj që është momenti i duhur që qeveria për koston e mëtutjeshme për veri t’i kërkojë BE-së ta ndihmojë me buxhet e financa”.