Qeveria holandeze nuk e mbështet vazhdimin e negociatave të pranimit midis Bashkimit Evropian dhe Serbisë duke dalë kundër hapjes së Grupit 3 për shkak të situatës në fushën e sundimit të ligjit.

Një zëdhënës i Ministrisë së Punëve të Jashtme holandeze ka rikujtuar se Këshilli Evropian, në përfundimet e tij nga viti 2024, deklaroi se ishte thelbësore që Serbia të bënte përparim të konsiderueshëm të mëtejshëm, ndër të tjera, në fushën e sundimit të ligjit.

“Vlerësimi i qeverisë holandeze për Paketën e Zgjerimit 2025 mbetet i vlefshëm: hapja e Grupit 3 në këtë kohë nuk do të bazohej në meritë, duke pasur parasysh shqetësimet në lidhje me sundimin e ligjit”, tha zëdhënësi i Ministrisë së Punëve të Jashtme holandeze në një përgjigje.

Siç ka mësuar REL nga burime diplomatike, të paktën pesë shtete anëtare të BE-së nuk e mbështesin hapjen e Grupit 3. Përveç Holandës, e cila e ka konfirmuar zyrtarisht këtë qëndrim, vendet që e kundërshtojnë atë përfshijnë, ndër të tjera, tre shtetet baltike dhe Suedinë.

Arsyet për kundërshtimin lidhen kryesisht me gjendjen e sundimit të ligjit, ndërsa në rastin e disa vendeve, siç u tha për REL fakti që Serbia nuk vendosi sanksione ndaj Rusisë për pushtimin e Ukrainës nuk mund të injorohet.