Protestuesit e Hong Kongut e kanë nisur dekadën e re në rrugë. Mijëra persona iu bashkuan marshit në ditën e parë të vitit 2020.

Ndonëse pjesa më e madhe e protestës ishte paqësore, dhuna shpërtheu në disa zona dhe policia përdori gaz lotsjellës.

Protesta në qytetin e kontrolluar nga Kina pati edhe në mesnatën e Vitit të Ri, kur mijëra protestues formuan zinxhir përgjatë rrugëve me dyqane.

Protestat në Hong Kong filluan para gjashtë muajve për shkak të projektligjit për ekstradimin e qytetarëve në Kinë.

Shtetet e Bashkuara dhe vendet kryesore evropiane kanë bërë thirrje për respektimin e të drejtave të njeriut në Hong Kong, ndërsa Kina e ka akuzuar Perëndimin për ndërhyrje në çështjet e brendshme të saj, duke i nxitur këto protesta.

Ndonëse një gjë të tillë e kanë kërkuar protestuesit, kryetarja e Hong Kongut, Carrie Lam, deri tash ka refuzuar të japë dorëheqje. Ajo e gëzon përkrahjen e Pekinit zyrtar.

Deri në vitin 1997, Hong Kongu ishte koloni e Britanisë së Madhe, ndërsa atë vit, ky shtet kishte arritur marrëveshje me Kinën për dorëzimin e pushtetit, shkruan “BBC”, transmeton Gazeta Express.