41 mijë komplete testimi në luftën ndaj COVID-19 janë dorëzuar në Institutin Kombëtar të Shëndetit Publik, raporton Ekonomia Online.

Ky donacion është financuar nga Luksemburgu dhe Austria, i cili po konsiderohet si i mirëseardhur për personelin shëndetësor.

Ministri i Shëndetësisë, Armend Zemaj, ka thënë se ky donacion do ta lehtësojë luftën kundër pandemisë COVID-19.

“Jemi në një front të përbashkët të angazhimit për t’ia lehtësuar qytetarëve luftën me pandeminë. Jemi këtu për ta falënderuar ambasadorin në emër të qytetarëve dhe UNDP-në që e kanë realizuar në kohë rekorde sjelljen e testimeve dhe do të na lehtësojë luftën tonë në situatën në të cilën gjendemi”, tha Zemaj.

I pari i Shëndetësisë ka bërë thirrje që të respektohen masat në mënyrë që të mos ngarkohet personeli shëndetësor.

“Mendoj që me ngritjen e këtyre kapaciteteve sado pak mund të arrijmë dhe ne të jemi më stabil që të ecim më tutje. Dhe ne sa më shumë duhet t’i respektojmë masat që mos te ketë nevojë për testime dhe që mos ta ngarkojmë personelin mjekësor”, u shpreh Zemaj për EO.

Drejtori i IKSHPK-së Naser Ramadani ka thënë se tash janë rritur edhe kapacitetet e testimeve.

Ai ka thënë se do të rritet numri i testimeve edhe në 6 institutet rajonale.

“Kanë sjellë në kontingjentin më të madh të testeve laboratorike dhe kanë sjellë 41 mijë teste të cilat do të shërbejnë për diagnostikimin laboratorik të virusit COVID-19. Ne kemi rritur kapacitetet dhe do të vazhdojmë duke i rritur por për një kohë të shkurtër edhe në 6 institutet rajonale”, tha Ramadani për EO.

Ndërsa Ambasadori i Austrisë në Kosovë, Christoph Weidinger, tha se Austria do të vazhdojë gjithmonë ta ndihmojë Kosovën e jo vetëm këtë herë me testime.

Që nga shpërthimi i COVID-19, UNDP në Kosovë, si Agjenci kyçe e Ekipit të OKB-së në Kosovë (UNKT), është duke mbështetur qytetarët dhe institucionet e Kosovës që të përgatiten, t’i përgjigjen dhe të rimarrin veten nga pandemia duke u përqëndruar veçanërisht në më të prekurit. Ne kemi zhvendosur me nguti fokusin, duke reaguar me shpejtësi dhe efikasitet dhe duke riorientuar programin tonë për të ndihmuar përpjekjet e Kosovës për të ndaluar përhapjen e virusit, mbrojtjen e njerëzve nga pandemia dhe ndikimet negative gjatë  shpërthimit dhe për të ndihmuar në ripërtëritjen ekonomike dhe sociale në muajt në vazhdim.