Sot pritet që të vazhdojë gjykimi në rastin e Fuad Ramiqit dhe katër imamëve- Bedri Robajt, Idriz Bilibanit, Enes Gogës dhe Mazllam Mazllamit, të cilët po akuzohen për vepra që lidhen me terrorizëm dhe thirrje për rezistencë.
Në seancën e kaluar si dëshmitar ishte dëgjuar përkthyesi Besim Mehmeti i cili ishte angazhuar nga gjykata për të përkthyer një ligjëratë të imamit Idriz Bilibani nga gjuha arabe në gjuhën shqipe.

Sa i përket kësaj ligjërate për të cilën nga prokuroria pretendohet se imami Bilibani ka nxitur persona të pacaktuar t’i bashkohen organizatës terroriste “Al Nusra” në Siri, bazuar në përkthimin e përkthyesit zyrtar Besim Mehmeti të cilin e kishte angazhuar gjykata që të e përkthente fjalë për fjalë ligjëratën e mbajtur nga Idriz Bilibani u vu në pah se në disa raste imami Zeqirja Qazimi i cili në atë rast kishte qenë në cilësinë e përkthyesit, kohë pas kohe ishte lëshuar në komente personale duke shtuar kështu fjalë nga vetja e tij të cilat nuk kishin qenë fjalët që hoxhë Idriz Bilibani i kishte thënë gjatë ligjëratës.

Sipas aktakuzës, Bedri Robaj që nga viti 2012 e deri në gusht të vitit 2014 në Prishtinë, në xhaminë e improvizuar te “Termokosi”, ku ka shërbyer si imam, gjatë predikimeve dhe ligjëratave private ka mbështetur xhihadin-shehidllëkun në Siri.

“Xhamia” te “Termokosi” ka vepruar jashtë juridiksionit të Bashkësisë Islame të Kosovës.
Ndërsa, Idriz Bilibani akuzohet se që nga viti 2012 e deri në kohën e arrestimit, në Prizren dhe në vende të tjera në Kosovë, si hoxhë gjatë mbajtjes së ligjëratave fetare në xhami – OJQ-në “El Bejan” dhe paraqitjet e tjera publike të incizuara në video, ka përcjellë mesazhe shtytëse që persona të pacaktuar t’i bashkohen organizatës terroriste “Al Nusra” në Siri.

Kurse, Enes Goga, në pozitën e hoxhës në Pejë, në një ligjëratë fetare para besimtarëve në Pejë, përmes “Audionur” me datën 10 mars 2014 të publikuar në YouTube, në të cilën kanë qasje një numër i pacaktuar i personave, publikisht ka nxitur urrejtje ndaj grupeve fetare të besimtarëve të krishterë.

Fuad Ramiqi akuzohet se prej fillimit të muajit shtator në paraqitjet e tij publike në mjetet e informimit, në televizione, gazeta dhe rrjete sociale, ka bërë thirrje për rezistencë ndaj organeve të drejtësisë.

Sipas Prokurorisë, me anë të këtyre veprimeve të akuzuarit Bedri Robaj dhe Idriz Bilibani kanë kryer veprën penale shtytje për kryerjen e veprave terroriste, kurse të akuzuarit tjerë Enes Goga e Mazllam Mazllami akuzohen se kanë kryer veprën penale nxitja e urrejtjes, përçarjes ose mosdurimit kombëtar, racor, fetar apo etnik.