Instagrami po fshin çdo postim që mbështet gjeneralin e vrarë iranian Qassem Soleimani, për të përmbushur sanksionet amerikane të vendosura ndaj vendit të Lindjes së Mesme.

Një zëdhënës i Facebook e konfirmoi lajmin për CNN Business, në të njëjtën ditë kur Presidenti amerikan Donald Trump njoftoi sanksione të reja ndaj Iranit, pasi ky vend sulmoi bazat amerikane në Irak.

Sulmi iranian erdhi pasi SHBA vrau gjeneralin Qassem Soleimani në 3 janar. Trump tha se Soleimani po planifikonte sulme në disa ambasada amerikane.

Instagrami është një nga rrjetet e pakta sociale të disponueshme për qytetarët iranianë, pasi Twitter dhe Facebook janë të bllokuara nga qeveria. Vendimi për bllokimin e postimeve pozitive për Soleimanin ka sjellë edhe reagimin e zyrtarëve të Iranit, transmeton A2CNN

Zëdhënësi i qeverisë iraniane, Ali Rabiei, e konsideroi këtë veprim si “jodemokratik”. Ironia është që reagimin e tij, zëdhënësi e bëri në Twitter.