Demarkacioni e Asociacioni i komunave me shumicë serbe nuk janë vullnet i popullit, madje as elektoratit që e përfaqëson Lidhja Demokratike e Kosovës, ka thënë deputeti i LVV-së, Fisnik Ismaili në Rubikon të KTV-së.

“Marrëveshjet nuk janë vullneti i popullit, as atyre që ju i përfaqësoni”, theksoi deputeti Ismaili duke përmendur sondazhet e bëra kohën e fundit dhe duke i kujtuar Sadri Feratit që koalicioni me PDK-në nuk është vullneti i atyre votuesve që LDK përfaqëson.

Në anën tjetër, Ferati e kundërshton atë duke i kujtuar se subjekti i tij dallon prej atyre që kërkojnë një Republikë të tretë dhe për të mirën e Kosovës kanë hyrë në një koalicion me PDK-në.

Ai ka theksuar se ka qenë e vështirë duke qenë se edhe elektorati ka qenë i papërgatitur dhe jo për një koalicion të tillë.

“Ne dallojmë prej tyre që kërkojnë një Republikë të tretë. Kemi hyrë në një koalicion që të shkohet përpara me shtetin dhe është e vërtetë që edhe elektorati ynë ka qenë i papërgatitur”, përfundoi Ferati.