Profesori amerikan, Edward Joseph, i cili ka thënë për Zërin e Amerikës se në Uashington të Shteteve të Bashkuara po diskutohet ideja për ndarjen e Kosovës, ka nxitur reagimin e ambasadorit amerikan në Gjermani, Richard Grenell.
Grenell i cili është i përzgjedhuri i Shtëpisë së Bardhë për ta ndihmuar dialogun Kosovë-Serbi, në llogarinë e tij në Twitter ka thënë se në prezencën e tij asnjëherë nuk është diskutuar për një gjë të tillë, transmeton Klan Kosova.
Mirëpo nuk ka vonuar shumë dhe Joseph i është kundërpërgjigjur Grenellit duke thënë se marrëveshjet mbi baza territoriale nuk funksionojnë.
“Kjo është ajo që kemi mësuar. Marrëveshjet e Ballkanit të bazuara në të drejta si ajo e Prespës dhe Ohrit funksionojnë; ato të bazuara në territore si e Dejtonit nuk funksionojnë. Kosova dhe Serbia mund ta arrijnë një marrëveshje që funksionon. Vetëm se nevojitet lidership”.