Kancelari i Austrisë, Karl Nehammer ka thënë Kosova dhe Serbia duhet të gjejnë një mënyrë që të ballafaqohen mes vete dhe të krijojnë një të ardhme prosperuese.

Ai gjatë një konference për media pas takimit me kryeministrin e Kosovës, Albin Kurti ka thënë se e rëndësishme është që partnerët ndërkombëtarë të lënë aq hapësirë që të dyja shtetet të mund të vendosin se sa larg mund të shkojnë në negociatat e tyre.

“Austria e sheh vetveten më së pari jo vetëm në marrëdhëniet midis Kosovës dhe Serbisë por në lidhje me të gjitha shtetet e Ballkanit Perëndimorë si urë me Bashkimin Evropian. Pra dhe në këtë ne e shohim veten si urë lidhëse e të dyja shtetet duhet të gjejnë mënyre që të ballafaqohen me njëri-tjetrin dhe të krijojnë një të ardhme prosperuese, paqësore për aq sa është e mundur. Pra me rëndësi është që partnerët ndërkombëtarë të lënë aq hapësirë që të dyja shtetet të mund të vendosin se sa larg mund të shkojnë në negociatat e tyre”, ka thënë ai.

Po ashtu siç tha Nehammer, Austria do të jetë e gatshme që të ofrojë ndihmë në përkrahje të dy shteteve.

“Njëkohësisht është shumë e rëndësishme dhe Austria do të jetë e gatshme që të ofrojë ndihmë në përkrahje ku për arsye të ndryshme nuk mund të gjendet kompromisi në atë moment. Pra është e rëndësishme besoj, dhe Austria është partnere e mirë në këtë drejtim dhe kjo është për shkak të historisë austriake pasi kanë ndodhur shumë gabime në të kaluarën tonë historike dhe kemi nxjerr mësimet tonë nga ato. Me këtë përvojë historike në i ofrojmë si ndihmë në dialogun midis Kosovës dhe Serbisë. Pasi paqja, prosperiteti mund të fitohet vetëm kur bëhet bashk”, u shpreh ai.

Ai theksoi se palëve në dialog duhet t’i jepet koha e mjaftueshme që të arrijnë një marrëveshje të suksesshme.

“Varet jo vetëm nga negociatorët që marrëveshja të jetë e suksesshme por është me rëndësi që të mundësohet koha e mjaftueshme për të gjetur rrugën e përbashkët. Pra ne jemi aty si urë lidhëse, si ndërtues urash. Sigurisht kemi pasur diskutime dhe me presidentin serb, Aleksandar Vuçiq dhe gjithmonë jemi në kërkim të gjetjes së zgjidhjeve të qëndrueshme për në këtë drejtim”.

I pyetur se a do ta përkrah Austria, Kosovën me trupa shtesë në NATO, ai tha: “Austria ofron më shumë se 300 ushtarë që kryejnë detyrat për siguri në Kosovë. E mbështesim thirrjen e Kosovës për shtim të numrit të trupave të NATO-s në Kosovë për siguri më të madhe dhe do të jemi të gatshëm që të ofrojmë trupa mbështetës nëse KFOR na e kërkon këtë gjë. Është më rëndësi të dihet se edhe komunitetet e ndryshme pajtohen me praninë e trupave të KFOR-it, pra jemi plotësisht të bindur dhe të gatshëm që të ofrojmë më shumë trupa nëse kjo kërkohet nga NATO dhe KFOR dhe qëndrojmë në dispozicion që të kontribuojmë në dialog sido që të na kërkohet”.