Ministrja e Industrisë, Ndërmarrësisë dhe Tregtisë, Rozeta Hajdari, ka raportuar në Komisionin për Ekonomi. Por, gjatë raportimit në lidhje me Projektin e konkurrueshmërisë dhe gatishmërisë për eksport-CERP, me huamarrje nga Banka Botërore pati edhe tensione mes anëtarëve të Vetëvendosjes dhe kryetarit të këtij komisioni, Ferat Shalës nga PDK, raporton Ekonomia Online.

Shala kritikoi ministren Hajdari se janë shkelur të gjitha kriteret e kërkuara për projektin e konkurrueshmërisë, dhe sipas tij përfitues të këtyre mjeteve janë kompani ndërtimore dhe këshilluese.

Po ashtu ai ngrehi edhe një shqetësim, se sekretari i kësaj ministrie është përfitues për shkollim në AUK.

Në lidhje me “Projektin e Konkurrueshmërisë dhe Gatishmërisë për Eksport-CERP huamarrje nga Banka Botërore” pati edhe tensione mes anëtarëve të LVV dhe kryetarit të këtij komisioni, Ferat Shalës nga PDK, anëtarëve Pal Lekaj nga AAK dhe Valentina Bunjaku nga LDK.

Ministrja Hajdari ka thënë se sekretarit i takon me Ligjin për Shërbyesit Civil që të avancohet profesionalisht.

“Edhe këtu, sekretari ka të drejtë për një trajnim, pra ai ka kërkuar një autorizim nga ana ime për t’u trajnuar që i takon me Ligjin për Shërbyesit Civil dhe unë duke u thirrur, tash se kam ligjin me vete, por është një klauzolë ku çdo shërbyes civil ka të drejtën për avancim profesional dhe ky ka aplikuar në trajnimin për menaxhimin e projekteve sa më kujtohet dhe unë ja kam aprovuar me plot besim sepse është trajnim, nëse ju aludoni në shkollimin e tij nuk janë paguar 12 mijë euro nga projekti, janë vetëfinancim nga ana e tij, ju mund t’i verifikoni faturat”, tha ajo në komision.

Më pas deputeti Shala i ka thënë pse mi dhënë 12 mijë euro, kur e ka në derë të zyrës me u trajnu te Qendra e Inovacionit dhe Teknologjisë në Universitetin e Prishtinës, falas.

Këtu, Hajdari tregon se nga shuma prej 12 mijë eurosh, 8 mijë euro janë vetëfinancim për master nga vetë sekretari, ndërsa 4 mijë euro janë ndarë për certifikim të trajnimi.

“Ne nuk ja imponojmë zyrtarit, 12 mijë euro nuk janë. Nga 12 mijë euro, 8 mijë euro janë vetëfinancim, 8 mijë euro i ka për programin e tij master, për vetëm certifikim të trajnimit që është zhvillim profesional, ai i ka 4 mijë euro. Ai ka aplikuar te ne për aprovim të certifikimit për trajnim dhe ka kërkuar nga kabineti të cilin ja kam aprovuar dhe është e drejtë e tij”, u shpreh ajo.

“Ai e ka sqaruar që brenda projektit janë komponentët për trajnime”, tha tutje.

Ajo kërkoi që të mos aludohet në shkollimin e tij.

“Mos aludoni në shkollimin e tij sepse po e thirrin gazetarët shkollim, po e thërras edhe unë sepse është vetëfinancim. Master programi i tij do të financohet nga vetë ai”, tha Hajdari.

Më pas në komision ministrja Hajdari u përgjigj edhe në pyetje të tjera, ku iu rikthye sërish temës së sekretarit, duke thënë se po “merr shantazhe nga mediat”.

“Ju lutem që të jeni sa më të sinqertë sepse unë po marrë shumë shantazhe nga mediat, jo edukimi, masteri, të gjitha këto, por këto nuk janë të vërteta, është një trajnim për aftësim profesional”, tha ajo.

Mbledhja është ndërprerë pas tensioneve mes anëtarëve të komisionit dhe ministes Hajdari.

Debati mes tyre është përcjellë me ndërprerje të fjalëve nga njëri-tjetri.

Për pianon 4 mijë euroshe që u mor me qera në Dubai, e u pagua nga buxheti i Kosovës, u ngrit debat i ashpër në komisionin për Financa ku po raporton ministre Rozeta Hajdari.

‘’Mos na shitni pallavra këtu ju ministrat. Keni bërë shkelje flagrante të marrëveshjes ndërkombëtare që është ratifiku në Kuvend’’, i tha Pal Lekaj ministre Hajdarit.

‘’Po më vjen keq për gjitha këto aludiume, të cilat dalin tek një eksport i pianos, që s’ka lidhje fare me buxhetin ndërkombëtar’’, u përgjigj Hajdari.

‘’Qysh s’ka lidhje”, tha Lekaj.

‘’Unë s’kam paguar pianon me paratë e huasë së bankës botërore. Ato pare janë nga buxheti i vitit 2021, dhe pjesa tjetër nga buxheti i vitit 2022″.

‘’Mos na i përsërit 100 mijë herë, këtu me lexu’’, tha Lekaj.

Deputetja e LDK-së, Valentina Bunjaku, kritikoi anëtarët e komisionit parlamentar – anëtar të Lëvizjes Vetëvendosje në pushtet – për përmendjen e rastit të kapjes me drogë në veturë të ish-sekretarit të Ministrisë së Tregtisë, Burim Rreci.

“Është marre me u përmend vjedhja e telefonave, me u përmend droga dhe thjeshtë me u deviju gjithçka në këtë mbledhje. Nuk është në rregull kjo”, tha ajo.

Mimoza Kusari-Lila përmendi paraprakisht gjatë diskutimit rastin e kapjes me 50 kilogramë marihuanë të ish-sekretarit Rreci.