Presidenti kinez Xi Jinping ka vizituar sot ‘qytetin zero’ Vuhan për herë të parë që prej lindjes së Coronavirusit vrasës në janar, në një shenjë të qartë se vendi tashmë beson se ka vënë epideminë nën kontroll.

Koha e vizitës së Xi tregon se Kina është pranë shpalljes së fitores ndaj krizës shëndetësore, e cila vrau të paktën 3,136 në vend dhe 4,062 në të gjithë botën.

Xi vizitoi sot spitalin me 1,000-shtretër të ndërtuar në 10 ditë për luftën ndaj epidemisë, para se të shkonte në një komunitet lokal me rezidentët nën karantinë.

Vizita e tij vjen teksa autoritetet në Vuhan kanë mbyllur 14 spitale të përkohshme të quajtura ‘fang cang’ të konvertuara nga salla sportesh e ekspozitash, të cilat trajtuan rreth 12,000 pacientë.

Zhvillimi vjen gjithashtu pas karantinës së paprecedentë të 11 milionë njerëzve në provincën qendrore të Hubei çka duket se ka dhënë rezultat me një rënie të ndjeshme të infeksioneve të reja javët e fundit.

Tashmë më shumë se 100 vende të tjera po luftojnë epideminë.