Gjatë një viti në Klinikën e Neurokirurgjisë në Qendrën Klinike Universitare të Kosovës, kryhen rreth 700 operacione. Ndër to, shumë operacione janë të rralla dhe sfiduese, që zgjasin deri në 10 orë, thonë profesionistët e kësaj fushe.

Kjo klinikë ka vetëm një sallë për operim, ndërkohë që aty ofrohen shërbime të sub-specializuara për intervenime në tru dhe kurriz.

Arsim Morina, neurokirurg, thotë për Radion Evropa e Lirë se prej pas luftës, rastet me tumor e që kanë nevojë për ndërhyrje kirurgjike, janë dukshëm më të shprehura sesa para kësaj periudhe.

“Në Klinikën e Neurokirurgjisë, brenda Qendrës Klinike Universitare, është vetëm një sallë operative. Andaj edhe lista e pritjes së pacientëve është e gjatë, për shkak të pamundësisë për t’i operuar në vetëm një sallë. Po t’i kishim dy salla, numri i pacientëve për operim do të rritej dhe lista e pritjes do të zvogëlohej”.

“Janë rreth 700 operacione që kryhen gjatë një viti në këtë klinikë. Prej tyre shumë operacione janë sfiduese e që zgjasin deri në 10 orë”, bën të ditur neurokirurgu Morina.

Pacientët, ndërkaq, thonë se trajtimin që e marrin në Klinikën neurologjike është në nivel. Njëra nga pacientet e cila sapo ishte operuar nga palca kurrizore, sipas familjarëve të saj, kishte kaluar mirë dhe se ndërhyrja kirurgjike ishte treguar e suksesshme. Motra e saj, Mimoza Sahiti, thotë se trajtimi nga stafi mjekësor ishte korrekt, por problem mbetet mungesa e barnave dhe materialit shpenzues.

“Motra është operuar sot. Me sukses e ka kryer operacionin. Kujdesi ka qenë në maksimum. Ne e kemi blerë vetë materialin shpenzues, madje edhe disa mjaft banale si katetera e disa tjera të lira. Por, barnat tjera, disa qetësues e disa tjera, na kanë thënë se i kanë të gjitha në klinikë”, tregon ajo.

Ndërkaq, neurokirurgu Morina thekson se me barna të listës esenciale qëndrojnë mirë aktualisht, por që përqindja variron. Ai përmend mungesën dhe jofunksionalitetin e aparaturave brenda QKUK-së, të cilat mungesa, sipas tij, po u shkaktojnë probleme pacientëve.