Kurrfarë veprimi nuk është ndërmarrë në lidhje me ristrukturimin e Qeverisë. Zotimi për ta bërë një gjë të tillë është dhënë muaj më parë nga eksponentët e koalicionit, por, duke parë mungesën e veprimeve, analistët kanë konstatuar se hapja e kësaj teme ka qenë strategji për të ngarkuar publikun me të, në kohën kur vlonin akuzat që lidheshin me demarkacionin e asociacionin.

Kësisoj, ekzekutivi kosovar vazhdon të mbetet ndër më të mëdhenjtë në rajon e në Evropë, shkruan Koha Ditore.

Jo veç që nuk ka nisur tkurrja e tij e paralajmëruar nga kryeministri Isa Mustafa e edhe nga presidenti Hashim Thaçi, por nuk është bërë as vlerësimi i performancës së ministrave.

Madje, Zyra e Kryeministrit nuk u ka kthyer përgjigje as organizatave të shoqërisë civile që i kanë sugjeruar asaj veprimet që duhet ndërmarrë për ta bërë më funksionale Qeverinë.

Edhe në fillim të mandatit e edhe tash, Instituti GAP ka prezantuar një udhërrëfyes për uljen e numrit të ministrive dhe posteve ministrore. Me të është kërkuar që Qeveria të tkurret në 13 ministri, pa e prekur shërbimin civil, por vetëm duke i eliminuar pozitat politike.