Komuniteti joshumicë kërkon rritjen e përfaqësimit të tyre në shërbimin civil. Kjo kërkesë është paraqitur në mbledhjen e Komisionit për të Drejtat, Interesat e Komuniteteve dhe Kthim, në të cilin është diskutuar lidhur me implementimin nenit 11, të Ligjit për Shërbimin Civil të Republikës së Kosovës.

Lidhur me zbatimin e këtij neni, i cili parasheh që në institucionet e vendit, në ato qendrore dhe lokale, të përfshihen 10% e shërbyesve civil nga komuniteti jo-shumicë, folën përfaqësuesit e këtyre komuniteteve, të cilët vlerësuan se ky nen nuk është duke u zbatuar sipas dispozitave të parapara të Ligjit për Shërbimin Civil të Republikës së Kosovës.

Ata u angazhuan dhe kërkuan nga Qeveria, që të gjejë forma dhe të nisë së zbatuari ky nen, në mënyrë që përfaqësimi i komuniteteve jo shumicë në institucionet e vendit të realizohet sipas kuotës së parashikuar.

Duke raportuar për zbatimin e këtij neni (11) të Ligjit për Shërbimin Civil të Republikës së Kosovës, kryetari i Këshillit të Pavarur Mbikëqyrës për Shërbimin Civil të Kosovës, Shkëmb Manaj, njoftoi se në nivelin qendror ky nen zbatohet në masën 6.24%, ndërsa në nivelin lokal realizohet në 16.83%.

Ai më tej sqaroi se bazuar në numrin e përgjithshëm të shërbyesve civil në nivel vendi (më se 17 mijë), mund të themi se ky nen arrin në masën e paraparë të dispozitës ligjore, por, megjithatë, nënvizoi ai, duhet përpjekur që shkalla e përfaqësimit të rritet në të dyja nivelet.

Për të arritur zbatimin e plotë të Ligjit, përkatësisht zbatimin e nenit 11 të tij, ai kërkoi bashkëpunim edhe më të ngushtë me komisionin.

Për zbatimin e këtij Ligji, bazuar edhe në debatin e sotëm, komisioni do të hartojë rekomandimet, të cilat do të shqyrtohen edhe në mbledhje plenare të Kuvendnit.