Lidhur me lajmin e publikuar dje se librat e historisë janë pastruar nga terma urrejtës, Jakup Krasniqi ka pyetur se nga cilat fjalë fyese janë pastruar ato

Kryetari i Këshillit Kombëtar të Nismës për Kosovën, Jakup Krasniqi, ka reaguar pas lajmit të publikuar se librat e historisë janë pastruar nga termat fyes apo urrejtjes.

Krasniqi ka ngritur një serë pikëpyetjesh në lidhje me këtë çështje duke thënë se cilat janë ato fjalë fyese që janë përdorur në librat e deritanishëm të historisë.

Ai në reagimin e tij, pyet se kush e ka marrë këtë vendim, me cilat fjalë janë zëvendësuar ato të mëparshmet, kur dhe ku është mbajtur ai forum, si dhe pyetje të tjera për të cilat ka kërkuar përgjigje nga Ministria e Arsmit.

Ndër të tjera, Krasniqi shprehet se historia e Kosovës, nuk ka filluar pas qershorit të vitit 1999.

”Dje mediat tona e dhanë një lajm sipas të cilit “librat e historisë janë pastruar nga termat fyes apo urrejtës.” Pas kësaj që u tha do të duhej të saktësohej se cilat paskan qenë fjalet fyese që janë përdorur në shkencën e historisë e të cilat më pas janë bartur edhe në tekstet mësimore të historisë për nxënësit e shkollës fillore dhe të mesme. Madje a vlen ky pastrim për të gjitha tekstet që merren me shkrimin e historisë si shkencë, apo vetëm me tekstet mësimore të historisë për nxënës deri në moshë 14-15-vjeçare.

Nëse është kështu si u tha, kush e mori atë vendim? Cili forum shkencor e mori vendimin për atë fshesë pastrimi? Për cilat fjalë fyese bëhet fjalë? Me cilat fjalë të buta e skofiare u zëvendësuan fjalët fyese? Për kë ishin fyese? Cili forum shkencor e bëri vlerësimin? Kur dhe ku është mbajtur ai forum?

Palën e Kosovës kush e përfaqësoi dhe kush e autorizoi atë nivel përfaqësimi? Gjithashtu nuk u tregua as kundër kujt ishin drejtuar ato fjalë “fyese”? Ndaj cilit pushtues kishte më shumë fjalë “fyese”? Më shumë fjalë të tilla kishte ndaj pushtimit Osman apo pushtimit të egër serbo-jugosllav? Madje, mos është pastruar edhe fjala pushtues dhe i egër? Për asnjë nga këto pyetje që u thanë, Ministria e Arsimit nuk jep përgjigje.

Këta të Ministrisë së Arsimit thanë diçka shumë interesante: “Ne duhet ta shkruajmë historinë tonë te re”! Thua se historia jonë është e fillon pas qershorit të vitit 1999?! Pra, historia fillon me ne! Kjo do të thoshte të jesh pa histori! Fazat tjera ose t’i pastrojmë si të na thonë ose t’i harrojmë.

Mbase dhe t’i hijeshojmë e himnizojmë. Vetëm periudhat pas pavarësisë së Shqipërisë (pas Luftës së Dytë Botërore) e te Kosovës (pas lirisë 1999 e pavarësisë së 17 shkurtit 2008), le t’i nxijmë më fjalët më denigruese e fyese. Pasi për fyerjet që ia bëjmë njëri-tjetrit askush nga jashtë nuk na kërkon llogari, as që na kërkohet që t’i heqim nga fjalori ato fjalë.

Një pyetje tjetër është më se e domosdoshme: A është marrë vendimi njëanshmërisht nga Kosova, apo kjo ka ardhur nga ndonjë forum i historianëve të Evropës Juglindore apo i vendeve të Ilirikut (Ballkanit)? Pasi edhe në tekstet e historisë të popujve të tjerë të Ilirikut (Ballkanit), ka jo pak fjalë fyese për shqiptarët! Apo mos edhe kjo çështje shkencore e arsimore u vendos në Bisedimet e Brukselit?

Konsideroj që opinioni ynë shkencor dhe arsimor duhet të njoftohet në detale se cilat fjalë u eliminuan dhe me cilat fjalë të reja u “pasurua” shkenca jonë!

Për këto çështje që u thanë është e domosdoshme të kemi një reagim profesional nga Institutet shkencore (Albanologjik dhe ai i Historisë) dhe Akademia e Shkencave e Arteve të Kosovës, por edhe profesorët e Universitetit të Prishtinës, sidomos ata të departamentit të historisë. Historia duhet të mësohet ashti si është, pa retushime politike”, ka reaguar Krasniqi.