Kryeprokurori i Shtetit, Zejnulla Gashi, ka ndërmarrë veprime konkrete institucionale për të zbardhur dhe analizuar të gjithë historikun e trajtimit të rasteve të raportuara nga e ndjera Arlinda Zekaj, e cila u privua nga jeta më 25 tetor 2026 në Pejë.

Përmes një komunikate për media, bëhet e ditur se koordinatori nacional për rastet e dhunës në familje tashmë është autorizuar për të analizuar me imtësi çdo veprim të deritanishëm institucional ku viktimë ishte e ndjera, transmeton Klankosova.tv.

Në kuadër të këtyre masave, nga kryeprokurorja e Prokurorisë Themelore në Pejë, Lumturije Vuçetaj, është kërkuar një raport i detajuar me shkrim mbi kronologjinë e plotë të rasteve.

Ky raport do të përfshijë Identitetin e personave të denoncuar dhe kualifikimin juridik të veprave, Emrat e prokurorëve kujdestarë dhe atyre që kanë poseduar lëndët, veprimet procedurale dhe afatet kohore kur janë ndërmarrë ato, vendimet e marra dhe arsyetimet përkatëse ligjore, shkallën e vlerësimit të rrezikut dhe masat mbrojtëse të kërkuara për viktimën, bashkërendimin me Policinë e Kosovës dhe institucionet relevante, trajtimin e veçantë të shkresës/ankesës së viktimës të dorëzuar më datë 22.10.2026.

Paralelisht me këtë, Kryeprokurori i Shtetit i ka kërkuar Inspektoratit Policor të Kosovës (IPK) të nisë veprime hetimore dhe verifikuese ndaj zyrtarëve policorë, për të verifikuar mënyrën se si janë pranuar, evidentuar dhe trajtuar denoncimet e Arlinda Zekajt në stacionet policore, me synim identifikimin e përgjegjësisë individuale apo institucionale.

Nga Zyra e Kryeprokurorit të Shtetit theksojnë se lënda po trajtohet me urgjencë dhe paanshmëri maksimale.

“Në rast se konstatohen shkelje të ligjit, neglizhencë apo mosveprime nga ana e zyrtarëve përgjegjës, do të ndërmerren masat përkatëse ligjore dhe do të kërkohet përgjegjësi për secilën shkelje të evidentuar, pa asnjë tolerim ndaj përgjegjësisë institucionale apo individuale”, thuhet në njoftim.