Kosova e ka partnerin dhe mikun më të madh SHBA-në, por politikanët aventurierë që nuk ndërtojnë strategji politike afatëgjatë dhe të qartë, si duket kanë lënduar besimin dhe raportet e ndërtuara me mund e gjak me SHBA-në.

Kryeministri i Kosovës duhet t’i marrë shumë seriozisht vërejtjet e bëra nga partnerët tanë strategjikë dhe të ndryshojë kursin politik në raport me dialogun dhe sigurinë rajonale.

Deklaratat e përfaqësuesve të Qeverisë e Presidentit të SHBA-së, nuk janë deklarata të ndonjë analisti politik të paguar për ta manipuluar elektoratin, por burojnë nga politika shtetërore, prandaj ne të gjithë duhet të jemi të shqetësuar lidhur me kursin politik të Qeverisë së Kosovës e të eksponentëve të saj politikë që herë pas here bëjnë veprime e deklarata të pamenduara mirë dhe në kundërshtim me atë që është strategji e SHBA-së e BE-së, lidhur me të ardhmen e Kosovës e rajonit tonë për integrim të përbashkët në BE.

Albini duhet ta kuptojë se nuk është në opozitë, por është nënpunësi i parë e kryesor në shërbim të Shtetit të Kosovës, të qytetarëve të saj. Prandaj edhe vërejtjet që i bëhen Kosovës i bëhen për shkak të të metave e gabimeve dhe veprimeve avanturiere e të papërgjegjëshme të qeverisë e jo të opozitës.

Si duket gjenerata e politikanëve të rinj kanë zgjedhur përplasjen e mosdëgjimin ndaj Perëndimit, politikë që i shkon për shtati armiqve të Kosovës e më së shumti regjimit të Vuçiqit.

Deklarimet për kushtetutshmëri e barazi ndërnacionale duhet të jenë të qarta e të prekshme nga miqtë e armiqtë e Kosovës, vetem atëherë do të marrim mbështetjen e duhur për kosoven, si në politikë, në zhvillim ekonomik dhe për integrim në institucione ndërkombëtare.