Kryetari i Lëvizjes Vetëvendosje, Albin Kurti, ka komentuar iniciativën e kryparlamentarit Kadri Veseli për themelimin e Tribunalit Ndërkombëtar për gjenocidini serb në Kosovë.

Ai në një postim në Facebook ka thënë se “a është e mundur që kryetari i Kuvendit nuk po e kupton që s’i beson më kush?”.

Kurti ka thënë se kërkesa për Tribunal Ndërkombëtar është dorëzim para krimit të Serbisë derisa ka listuar disa arsye se pse nuk e përkrah një iniciativë të tillë.

“Kërkoi Tribunal Ndërkombëtar për gjenocidin e Serbisë në Kosovë, duke dëshmuar që dikush tjetër na u dashka të merret me gjenocidin e Serbisë dhe jo vetë Kosova si shtet. E, paraprakisht kishte deklaruar se kriminelët serbë do t’i tërheq zvarrë”.

“Kërkesa për Tribunal Ndërkombëtar është dorëzim para krimit të Serbisë, është heqje dorë nga e drejta dhe detyra e shtetit tonë të pavarur, e Republikës së Kosovës, për të sjellë drejtësi për viktimat tona të luftës. Kjo kërkesë vetëm sa amniston prokurorët e Kosovës që paguhen nga buxheti i shtetit e të cilët sa i përket krimeve të luftës, në rastin më të mirë, ishin pasivë”.

I pari i Vetëvendosjes e ka ndërlidhur iniciativën e Kadri Veselit me Gjykatën Speciale.

“Nuk e ka ky hallin e Tribunalit që na mungon por të atij Special që e kemi tepricë. Pra, nuk e ka qëllimin për të sjellë drejtësi për viktimat tona dhe dënim për kriminelët serbë (sepse i pati 20 vjet për këtë punë teksa kishte në pronësi thasë me informacion që pohonte se ShIK-u ka arritur t’ia marrë Serbisë). Jo, ai po orvatet t’i kundërvihet Gjykatës Speciale të cilën vetë këta e sollën më 3 gusht 2015, me trysni të paparë mbi deputetët e tyre”.

“Në vend që sot të marrë përgjegjësi e të jap dorëheqje, ai ia hodhi krejt fajin deputetes së vet Flora Brovina, pasi që i dështoi orkestrimi i sulmit mbi deputeten tonë Saranda Bogujevci. A është e mundur që ky ende nuk po e kupton që s’i beson më kush?”.