Presidenti francez Emmanuel Macron u shpreh se dëshiron humbjen e Rusisë ndaj Ukrainës, por jo kolapsin e saj.

Në të njëjtën kohë ai paralajmëroi ata që “mbi të gjitha duan të shtypin Rusinë” se ky nuk do të jetë kurrë qëndrimi i vendit të tij.

“Unë dua humbjen e Rusisë në Ukrainë dhe dua që Ukraina të jetë në gjendje të mbrohet, por jam i bindur se, në fund, kjo nuk do të bëhet me mjete ushtarake”, tha Macron në një intervistë që dha për mediat franceze.

“Unë nuk besoj, siç bëjnë disa, që ne duhet ta shkatërrojmë plotësisht Rusinë, ta sulmojmë atë në tokën e saj. Këta vëzhgues duan mbi të gjitha të shtypin Rusinë. Ky nuk ishte dhe nuk do të jetë kurrë qëndrimi i Francës,” shtoi ai.

“Vëzhguesit” duket se janë, për presidentin francez, ata që, kryesisht në Evropën Lindore, kritikuan ashpër, në maj 2022, deklaratën e tij se Rusia duhet “poshtëruar”.

Në të njëjtën intervistë, që dha të premten mbrëma në avionin që e çoi në Mynih, Macron përsëriti se preferon një zgjidhje të negociuar.

“Ajo që nevojitet sot është që Ukraina të nisë një ofensivë ushtarake që do të ndajë frontin rus për të realizuar një rikthim në negociata,” tha ai për tre mediat franceze.

Macron argumentoi gjithashtu se “asnjë nga të dy palët nuk mund të mbizotërojë as Ukraina, as Rusia, sepse rezultatet e mobilizimit nuk janë aq të rëndësishme sa parashikuan dhe ata (Rusia) kanë mundësi të kufizuara”.

Emmanuel Macron tha gjithashtu se “të gjitha opsionet e tjera përveç Vladimir Putin në sistemin aktual” i dukeshin “më keq” se presidenti rus, duke aluduar për kreun e Këshillit të Sigurimit të Rusisë, Nikolai Patrushev dhe themeluesin mercenar të Wagner, Yevgeny Prigozhin.

“A besojmë vërtet se një zgjidhje demokratike do të dalë nga shoqëria civile ruse pas viteve të mizorisë dhe në mes të luftës? Shpresoj sinqerisht, por nuk besoj”, përfundoi ai.