Një francez i moshuar ka mbijetuar 16 orë në det duke përdorur një flluskë ajri brenda varkës së tij të përmbysur.

62-vjeçari u shpëtua nga ujërat e akullta të Oqeanit Atlantik nga roja bregdetare spanjolle, shkruan Euronews.

Roja bregdetare e Spanjës gjeti varkën me vela 12 metra të përmbysur, pasi mori një sinjal shqetësimi në mbrëmjen e së hënës.

Megjithatë, marinarit iu desh të priste deri në mëngjes për një shpëtim, sepse deti ishte shumë i trazuar.

Tre helikopterë dhe një anije shpëtimi u përpoqën për të shpëtuar njeriun, emri i të cilit nuk bëhet i ditur, pasi morën sinjalin e fatkeqësisë në orën 20:23 me kohën lokale.

Një nga helikopterët zbuloi anijen e përmbysur ndërsa dielli po perëndonte dhe dërgoi një zhytës për të kontrolluar për shenja jete.

Burri u transportua me helikopter në një vend të sigurt dhe u dërgua në spital për kontrolle dhe u lirua menjëherë më pas pa asnjë problem shëndetësor.