Të licencuar nga Ministria e Arsimit Shkencës dhe Teknologjisë dhe në bashkëpunim me Sindikatën për Arsim Shkencë e Kulturë, ligjëruesit e Departamentit të Gazetarisë së Universitetit të Prishtinës “Hasan Prishtina”, kanë vazhduar trajnimin e mësimdhënësve në fushën e edukimit medial.

Deri me tani janë certifikuar rreth njëmijë mësimdhënës nga e gjithë Kosova, të cilët kanë marrë njohuri bazike për përdorimin e mediave, përmbajtjet mediale dhe zhvillimin e gjykimit kritik gjatë përdorimit të tyre. Ligjëruesit Remzie Shahini – Hoxhaj, Gëzim Qerimi, Faton Ismajli, Alban Zeneli, Muhamet Jahiri, Dren Gërguri dhe Blerta Blakaj, vetëm gjatë muajit shtator dhe tetor kanë mbajtur trajnime në shumë qytete të Kosovës si: Prishtina, Gjilani, Podujeva, Mitrovica, Ferizaj, Vitia, Peja, Gjakova, Vushtrria e Drenasi.

Këto trajnime i ka mbështetur dhe i ka cilësuar si të domosdoshme Sindikata Evropiane për Arsim, pjesë e sëcilës është edhe SBASHK-u. Trajnimi me temën “Edukimi medial dhe roli i tij në zhvillimin shoqëror dhe demokratik”, po konsiderohet si i nevojshëm dhe i domosdoshëm nga ana e mësimdhënësve, ndaj të cilëve përvoja e fituar do të shërbejë për thellimin e njohurive për përdorimin e mediave edhe për aspekte mësimore.

Lënda mësimore “Edukimi medial”, është pjesë e kurrikulave në të gjitha vendet e Bashkimit Evropian në shkollimin parauniversitar, ndërkaq, është edhe njëri nga standardet që duhet të plotësohet si kusht nga ana e vendeve që aspirojnë integrimin në familjen evropiane.

Në kuadër të shtrirjes së projektit për “Edukimin medial”, ligjëruesit e Departamentit të Gazetarisë kanë arritur marrëveshje me menaxhmentin e Universitetit Publik të Gjilanit “Kadri Zeka”, që të organizojnë trajnim për studentët dhe pedagogët e Fakultetit të Edukimit, projekt i cili do të fillojë gjatë muajit nëntor.

Që nga viti 2010, ka pas përpjekje nga ana e Departamentit të Gazetarisë për vetëdijesimin shoqëror për nevojën e futjes së lëndës së Edukimit medial në shkolla. Mirëpo, një gjë e tillë nuk e ka pas vullnetin e institucioneve të arsimit, e as të qeverive të kaluara. Ky trajnim në bashkëpunim më SBASHK-un do të vazhdojë në të gjitha komunat e vendit.