Vetëm 640 nga më shumë se 51 mijë persona që vdiqën nga COVID-19 brenda gjashtë muajve të parë të këtij viti u vaksinuan plotësisht, sipas shifrave të fundit.

Të dhënat nga Zyra për Statistikat Kombëtare (ONS), për muajt midis 2 janarit dhe 2 korrikut, kanë gjetur se programi i imunizimit në Mbretërinë e Bashkuar po zvogëlon shanset e vdekjes te personat e vaksinuar me dy doza.

“Rreziku i vdekjes që përfshin COVID-19 ishte vazhdimisht më i ulët për njerëzit që kishin marrë dy doza të vaksinës, në krahasim me ata që ishin vaksinuar me një dozë, dhe me ata që nuk ishin vaksinuar fare”, tha ONS në analizë, transmeton Telegrafi.

Njoftimi vjen derisa kryetari i Bashkisë së Londrës Sadiq Khan paralajmëroi në Twitter gjatë ditës së djeshme se gati 90 për qind e pacientëve me COVID-19 në kujdeset intensive në verilindje të Londrës u zbuluan se nuk ishin të vaksinuar plotësisht.

“Unë i bëj thirrje çdo londinezi të kualifikuar që nuk ka marrë dy doza vaksine ta bëjë atë prioritet. Mbroni veten, komunitetin tuaj dhe Shërbimin Shëndetësor Kombëtar”, shkroi ai në Twitter.