Ministri ukrainas i Mbrojtjes Oleksiy Reznikov i tha CNN se do të ketë një “masakër vërtet të përgjakshme” nëse Rusia vendos të pushtojë Ukrainën dhe paralajmëroi se “djemtë rusë gjithashtu do të kthehen në arkivole”, mes alarmit të shtuar për lëvizjet e trupave në kufirin e kombeve, transmeton EkonomiaOnline.

Reznikov i kërkoi Presidentit të SHBA Joe Biden, i cili do të fliste me Vladimir Putinin e Rusisë në një telefonatë videokonferencë të martën, të qëndrojë i vendosur kundër Moskës.

“Nëse mund të këshilloj Presidentin Biden, do të doja që ai t’i artikulonte zotit Putin se asnjë vijë e kuqe nga ana e Kremlinit nuk duhet të jetë këtu. Vija e kuqe është këtu në Ukrainë dhe bota e qytetëruar do të reagojë pa hezitim,” tha Reznikov për CNN, në një intervistë ekskluzive të hënën.

“Ideja për të mos provokuar Rusinë nuk do të funksionojë”, shtoi ai.

Zyrtarët amerikanë dhe perëndimorë kanë shprehur shqetësimin për grumbullimin e forcave ruse në kufirin ukrainas, me Sekretarin e Shtetit Antony Blinken që tha javën e kaluar se SHBA “duhet të përgatitet për të gjitha rastet”.