Ministri i Drejtësisë, Abelard Tahiri, ka vizituar sot Qendrën Korrektuese për të mitur dhe femra në Lipjan. Në Ditën Ndërkombëtare të Gruas, ai ka takuar gratë e burgosura, të cilave ua ka dhuruar nga një lule. Për to ka pasur dhe disa porosi.

Sipas një komunikate të MD-së, Tahiri ka kërkuar nga gratë që mos të mendojnë për arsyet që i kanë sjell aty, por të mendojnë për të ardhmen që i pret jashtë.

“Duhet të hiqni dorë nga mendimi se nuk mund të ndryshoni jetën tuaj apo që nuk ia vlen të provoni. Ju inkurajoj që kohën që e kaloni këtu të mësoni ndonjë zanat dhe të dilni nga këtu me një vizion më të qartë për jetën tuaj”.

Më tutje, Tahiri ka theksuar se është i vetëdijshëm që mundësitë që iu ofrohen për trajnime janë të vogla, por ka premtuar se do të punohet në krijimin e Njësive Ekonomike, të cilat do të ndihmojnë më shumë në gjendjen e tyre ekonomike.

Sipas ministrit, rendi publik nuk duhet të nënkuptoj vetëm masa të rritura sigurie, andaj drejtësia do të fokusohet në masa parandaluese.

“Synim i imi është që tërë koncepti i drejtësisë në vend, të orientohet në preventivë dhe edukim e jo vetëm në dënim”, ka thënë Tahiri.

Ministri ka falënderuar për punën e tyre edhe personelin profesional të kësaj Qendre.