Mjekët në një spital privat në kryeqytetin e Indisë, New Delhi, kanë realizuar me sukses një operacion të vështirë që ka zgjatur 3 orë e gjysmë. Ata kanë bërë të mundur largimin e tumorit më të madh ovarial në botë, nga trupi i një 52-vjeçareje.

“Anadolu Agency” shkruan se tumori peshonte plot 50 kilogramë, transmeton Shqip. Gruaja kishte shtuar peshë muajt e fundit dhe ishte 106 kilogramë, ku vetëm 50 kg i kishte nga tumori. Së fundmi, ajo kishte filluar të ndjente vështirësi në frymëmarrje, dhimbje akute në bar dhe rrjedhimisht edhe vështirësi në ecje dhe në gjumë.

Më tej thuhet se nuk kishte hapësirë në barkun e pacientes për të futur pajisje me anë të metodave të ndihmuara nga robotët, kështu që ekipi kirurgjikal bëri operacionin në mënyrë tradicionale më 18 gusht.

Specialisti i gastroenterologjisë kirurgjikale dhe kirurgjisë bariatrike në Spitalet Indraprastha Apollo, Arun Prasad, ka treguar se gjatë përvojës së tij mbi 30 vite si kirurg “kurrë nuk kishte hasur në një rast ku tumori përbën pothuajse gjysmën e peshës së trupit të personit”.

“Për shkak të tumorit gjigant, trakti i zorrëve ishte i ngjeshur dhe i rrafshuar, gjë që po bënte presion në zorrë duke çuar në rrezikun e këputjes në vezore. Për fat të mirë, tumori ishte beninj dhe pacientja nuk kishte komorbiditete, gjë që mundësoi shërim më të shpejtë. Pas operacionit, pesha e saj ra në 56 kilogramë”, shtoi Prasad.

Ndërkohë në vitin 2017, një tumor 34 kilogramë u hoq nga vezoret e një pacienteje në qytetin jugor Coimbatore.

Kujdes! Foto e rëndë