Një komunë e kryeqytetit të Belgjikës, Bruksel, ka dhënë urdhër për arrestimin e të gjithë të pastrehëve të cilët refuzojnë të shkojnë në strehimore

Për shkak të “ftohtit siberian” që ka përfshirë qytetin, një komunë e kryeqytetit të Belgjikës, Bruksel, ka dhënë urdhër për arrestimin e të gjithë të pastrehëve të cilët refuzojnë të shkojnë në strehimore, transmeton Anadolu Agency (AA).

Kreu i komunës Etterbek, Vincent De Wolf, bëri të ditur se si pasojë e rënies së temperaturave në -10 gradë celsius në qytet, do të arrestohen të gjithë të pastrehët të rrezikuar nga ngrirja të cilët refuzojnë të shkojnë në strehimore.

“Të pastrehët e ngelur në rrugë në këtë të ftohtë mund të përjetojnë hipotermi dhe mund edhe të vdesin nga i ftohti”, u shpreh De Wolf, duke shtuar se ky vendim është marrë për të mbrojtur të pastrehët të cilët refuzojnë të përdorin mundësitë e strehimoreve.

Në rast të mosndryshimit të gjendjes së motit, kreu i komunës Etterbek tha se vendimi do të jetë i vlefshëm deri më 8 mars.

“Prefekti është i ngarkuar ligjërisht me detyrën e garantimit të sigurisë për personat nevojtarë”, shtoi ai.

– Alarm portokalli nga moti i ftohtë

Nga ana tjetër, si pasojë e të ftohtit ekstrem që ka kapluar tërë vendin, Instituti Meteorologjik i Mbretërisë së Belgjikës ka shpallur alarm portokalli.

Instituti në fjalë paralajmëroi se “moti polar” i ardhur nga veriu do të jetë shkak për uljen ekstreme të temperaturave dhe bëri të ditur se temperaturat, veçanërisht në mbrëmje dhe orët e hershme të mëngjesit, mund të bien në -10 gradë për shkak të erërave që fryjnë nga lindja dhe verilindja.

Ndërkaq, mediat lokale të Belgjikës bënë të ditur që si pasojë e të ftohtit të acartë, në vend kanë humbur jetën tre persona.