Prokuroria Themelore në Prishtinë ka dhënë detaje në lidhje me rastin e mbrëmshëm, ku Gent Myftari ka therur për vdekjen vëllanë e tij, Auron Myftari.

Në njoftim bëhet e ditur se viktima ka ndërruar jetë në vend të ngjarjes, ndërsa motivet dhe rrethanat tjera për momentin janë të panjohura “por të njëjtat do të kuptohen gjatë hetimeve të cilat do të zhvillohen nga kjo Prokurori”. 

Tutje, thuhet se trupi i pa jetë i gjetur në vendin e ngjarjes është dërguar në Institutin e Mjekësisë Ligjore në Prishtinë.

Njoftimi i plotë:

Prokuroria Themelore në Prishtinë njofton opinionin publik se Prokurorja kujdestare dje në mbrëmje nga Policia e Kosovës është njoftuar se  në rrugën “Tirana” në Prishtinë ka ndodhur një therje me thikë ku viktima ka ndërruar jetë në vend të ngjarjes. 

Prokurorja kujdestare ka dalë në vendin e ngjarjes dhe së bashku me hetuesit policor kanë ndërmarr të gjitha veprimet e nevojshme hetimore, me urdhër të prokurorit të shtetit është bërë sigurimi i vendit të ngjarjes nga Policia e Kosovës, po ashtu me urdhër të Prokurorit trupi i pa jetë i gjetur në vendin e ngjarjes është dërguar në Institutin e Mjekësisë Ligjore në Prishtinë për të iu bërë Autopsia.

Rasti penal është filluar në drejtim të veprës penale “Vrasja e Rendë” si dhe veprën penale “Mbajtja në pronësi, kontroll ose posedim të paautorizuar të armëve” ku në këtë rast me vendim të prokurorit është ndaluar një (1) person.

Motivet dhe rrethanat tjera për momentin janë të panjohura por të njëjtat do të kuptohen gjatë hetimeve të cilat do të zhvillohen nga kjo Prokurori. 

Brenda afatit ligjor Prokurori i shtetit do të paraqes pranë gjykatës kompetente kërkesën për caktimin e masës së sigurisë për të dyshuarin për këtë rast.