Në Ministrinë e Punëve të Brendshme u mbajt takimi i grupit për zbatimin e strategjisë Kundër Terrorizmit 2018-2023. Takimin e hapi Ministri i Punëve të Brendshme, Ekrem Mustafa.

Me këtë rast ministri Mustafa përgëzoi për punën e deritanishme institucionale anëtarët e këtij grupi. Ai tha se implementimi i Strategjisë dhe Planit të Veprimit kundër Terrorizimit është jashtëzakonisht shumë kompleks dhe kërkohet përkushtim dhe qasje sistematike.

“Strategjia bazohet në katër shtylla të cilët janë në harmoni të plotë me Strategjinë e Bashkimit Evropian kundër Terrorizmit. Ne duhet të bazohemi në praktikat e deritanishme të botës demokratike. Parandalimi, mbrojtja, ndjekja dhe reagimi janë jo thjeshtë shtylla mbi të cilat dizajnohet tutje strategjia, por janë vetë objektivat strategjik të cilët duhet të synojmë”, theksoi ministri Mustafa.

Ministri Mustafa vuri në dukje se Republika e Kosovës, si anëtare e koalicionit global kundër terrorizmit, ka treguar përkushtim dhe njëkohësisht ka marrë përgjegjësi dhe obligime të caktuara, të cilat janë përfshirë në këtë strategji.

Ministri Mustafa kërkoi nga anëtarët e grupit punues për implementimin e aktiviteteve që të përfshihen të gjitha dimensionet, ashtu siç kërkohet në dokumentin e aprovuar.

Ndërsa anëtarët e grupit punues u shprehën të gatshëm në kuadër  të kapaciteteve ndërinstitucionale në implementimin e aktiviteteve që janë të paraparë në këtë strategji dhe vlerësuan se deri më tani shteti i Kosovës ka bërë përpjekjeje maksimale në paramendimin dhe luftimin e terrorizmit.