Kryeministri i Kosovës, Isa Mustafa, në një intervistë për “Ekonomia Online” ka paralajmëruar ndryshimin e formatit të dialogut me Serbinë dhe përfshirjen në bisedime edhe të opozitës e shoqërisë civile.

Kreu i Qeverisë thotë se dialogu domosdoshmërish duhet të ndryshojë. “Ne jemi që në formatin e ardhshëm të dialogut të kemi përfaqësues të Zyrës së Presidentit, të Kuvendit të Kosovës, të opozitës dhe të shoqërisë civile”.

Sipas tij, rasti i ndërtimit të murit ilegal në afërsi të urës së Ibrit, në veri të Mitrovicës, flet për joseriozitetin e Serbisë në procesin e dialogut. Ai thotë se ndërtimi i këtij muri është më tepër problem i Brukselit. “Është problem i produktit që neve po na lind nga sjellja me obstruksion e Serbisë në këtë proces të dialogut”.

Muri thotë se nuk ka qenë asnjëherë pjesë e marrëveshjeve dhe duhet të rrënohet nga “ata që e kanë ndërtuar”.

“Në Bruksel është folur për rikonstruktimin e urës dhe qëllimi i rikonstruktimit ka qenë që t’i heqin barrikadat nga ura… Mirëpo shndërrimi i rrugës në shëtitore nuk është në kompetencë as të qeverisë qendrore, as të Brukselit, është në kompetencë të Komunës… Është ndërtim që bie në fushëveprime të pushtetit lokal dhe për këtë arsye duhet inspektorati lokal, ose i pushtetit të Komunës Veriore të Mitrovicës të marrë masën”, thotë Mustafa.

“Nuk mund të themi tash se kryeministri po bëhet një njeri i fortë, me vendime të forta, ai po jep urdhra që me nis buldozerin me rrënu murin”.

Në intervistën e fundvitit për “Ekonomia Online”, Mustafa flet dhe për çështjen e demarkacionit dhe liberalizimit të vizave.

Thotë se nëse deri në fund të janarit nuk ratifikohet demarkacioni me Malin e Zi, Kosova do të mbetet edhe gjatë 2017-ës pa liberalizim të vizave dhe për këtë fajin dhe përgjegjësinë do ta marrin opozita, por edhe çdo deputet veç e veç. “Qeveria punën e vet e ka kryer…Malit të Zi asnjë metër s’ia japim”

“Nëse arrijmë që të ratifikojmë marrëveshjen në muajin e parë të vitit të ardhshëm do të thotë gjatë janarit atëherë ne kemi shanse që në fillim të vitit të ardhshëm t’i kemi vizat e liberalizuara”.

Mustafa, partia e të cilit gjatë fushatës zgjedhore pat premtuar 120 mijë vende pune, thotë se deri më tani kanë punësuar 40 mijë veta.

INTERVISTA E PLOTË E KRYEMINISTRIT ISA MUSTAFA:

Z. Mustafa tashmë janë bërë dy vjet që e keni marrë “timonin” e Qeverisë së Kosovës. Sa është realizuar platforma juaj e qeverisjes?

Mustafa: Mendoj se kemi arritur ta realizojmë platformën. Në disa fusha kemi shkuar edhe më mirë se atëherë që kemi qenë në gjendje të parashohim. Prioritetet themelore kanë qenë në fushën e zhvillimit ekonomik, në forcimin e shtetit ligjor, në fushën e integrimeve evropiane dhe po ashtu në agjendë kemi pasur edhe arsimin dhe shëndetësinë. Kemi pasur po ashtu edhe sfida të caktuara të çështjeve të cilat ne nuk i kemi pasur si pjesë të programit qeveritare, siç ka qenë dialogu me Serbinë, pastaj rezultatet dhe konsekuencat e këtij dialogu që u shpreh edhe te disponimi qytetar edhe tek disponimi i opozitës. Mirëpo ato se çfarë ne kemi synuar të realizojmë si orientim paraprak të themi të kontraktuar ndërmjet partnerëve të koalicionit mendoj se atë e kemi arritur. E kemi pasur një përkushtim të mirë të anëtarëve të qeverisë, pa marrë parasysh se cilit grupacion politik i kanë takuar dhe mendoj që jemi në një rrugë të mirë që programin ta realizojmë.

EO: Si LDK-ja, ashtu edhe PDK-ja, gjatë fushatës zgjedhore patët premtuar mijëra vende pune. Në këtë gjysmë-mandat tuajin sa vende të reja punë janë krijuar?

Mustafa: Tash ne kemi llogaritur, në vitin 2015, sipas të dhënave edhe statistikore edhe të fondit të kursimeve pensionale por edhe të dhënave të tjera rrethanore se diku ka pasur rreth 18 mijë njerëz që janë evidentuar që janë të punësuar të rinj. Tash nuk mund të them saktësisht se a janë krejt këto vende të reja të punës, apo janë edhe çështje të shndërrimit informal në punësim formal të një pjese. Prapë nuk barazohet me fluksin e të papunëve që neve na hynë në tregun e punës që është rreth 23 mijë apo 25 mijë veta. Në 2016 llogarisim se do të kemi mbi 20 mijë që do të hyjnë në tregun e punës dhe do të llogarisim të kemi rreth 40 mijë të punësuar brenda këtyre dy viteve të qeverisjes dhe me këtë rritje ekonomike unë parashoh që edhe pastaj të jenë mjaftë të suksesshme.

EO: Rritja ekonomike këtë viti ishte rreth 4 për qind, kurse buxheti, tashmë i miratuar në Kuvend, për vitin 2017 kap shifrën 2 miliardë euro… Sa janë premtues për zhvillim ekonomik këto shifra?

Mustafa: Gëzohem që kemi arritur të bëjmë buxhetin 2 miliardë. Tani ju e dini se buxheti prej 2 miliardë e 1 milion euro nuk është buxhet krejt i bazuar në të hyrat fiskale dhe të hyrat tatimore dhe jotatimore. Një pjesë e këtij buxheti është edhe nga huat, të cilat ne do t’i shfrytëzojmë për investime. Por ajo është me rëndësi është se edhe ato do t’i kthejmë në parat publike, pra huat do të shfrytëzohen për objekte publike të cilat krijojnë infrastrukturë për zhvillim ekonomik, për uljen e qarkullimit të mallrave dhe të udhëtarëve për rritjen e shpejtësisë së komunikimit që prapë e rritë kredibilitetin ekonomik dhe bëhet më tërheqës për investime të huaja direkte. Do të thotë ne e parapërcaktojmë një ambient biznesi përmes këtyre investimeve që do të bëhen. Tani si investime të reja në i kemi investimet në hekurudhë, rikonstruktimi i hekurudhës që është një investim që përkrahet nga Komisioni Evropian, nga Banka Evropiane për Investime dhe Banka Evropiane për Zhvillim dhe Rindërtim. Janë pastaj rruga ekzistuese që ne e vazhdojmë edhe më tutje për Shkup, që kryesisht financohet nga Buxheti i Republikës së Kosovës dhe për vitin e ardhshëm parashohim që një pjesë të financohet edhe nga të ardhurat që ne do t’i marrim edhe nga Agjencia Kosovare e Privatizimit, që janë të liruara, dhe që ne marrim atje si mjete që janë të liruara dhe që i takojnë qeverisë, sepse janë përmbushur të gjitha obligimet ligjore të atyre kompanive të cilat ne i marrim mjete nga AKP-ja. Janë edhe rrugët për Podujevë, magjistralja për Pejë, është magjistralja për Gjilan edhe këto dy magjistrale të tjera të cilat kemi mbetur, kjo për Mitrovicë dhe ajo për Skenderaj, të cilat do të vazhdojnë. Dhe ne mendoj se objektivisht gati e përmbushim një cikël të investimeve në infrastrukturë dhe ofrojmë kushte shumë më të mira që prej vitit 2018 e tutje të ketë investime në arsim, investime në forcimin e shtetit ligjor dhe investime për shëndetësi që janë fusha të cilat duhet sa më shpejt t’i futen në agjendën tonë investuese.

EO: Që nga marrja e detyrës si kryeministër jeni përballur me protesta të opozitës. Opozita po vazhdon ende të kundërshtojë dy marrëveshjet e arritura në Bruksel, atë për demarkacionin dhe Asociacionin e Komunave Serbe. Ndërsa vendimi i BE-së, tashmë është i ditur që pa ratifikimin e demarkacionit nuk do të ketë liberalizimi vizash. A mund të iu premtoni qytetarëve se kjo punë do të kryhet më 2017. Dhe nëse kryhet, a është e sigurt heqja e vizave?

Mustafa: Nëse arrijmë që të ratifikojmë marrëveshjen në muajin e parë të vitit 2017, do të thotë gjatë janarit, atëherë ne kemi shanse që në fillim të vitit të kemi vizat e liberalizuar. Në qoftë se këtë nuk do të arrijmë të bëjmë, unë nuk i siguroj qytetarët se do të ketë liberalizim për arsye se Bashkimi Evropian hynë në disa procese të tjera për të cilat Kosova dhe liberalizimi i vizave për Kosovës më nuk është i rëndësishëm. Do të kemi zgjedhje në Holandë, do të kemi zgjedhje në Francë kah gjysma e vitit, do të kemi zgjedhje në Gjermani vjeshtën e vitit të ardhshëm. Çështja e ratifikimit të marrëveshjes së kufirit që është përgjegjësi e deputetëve të kuvendit të Republikës së Kosovës, e çdonjërit veç e veç, dhe e Kuvendit në përgjithësi, sepse qeveria punën e vet e ka kryer. Prandaj sa i përket Qeverisë, ne nuk kemi çka të bëjmë në këtë aspekt. Kuvendi tani ka përgjegjësinë para të gjithë qytetarëve të Republikës së Kosovës, dhe secili deputet veç e veç, sidomos ata që e kanë politizuar këtë fushë dhe e kanë bërë kauzë politike, saqë më totalisht nuk përkon me realitetin.

EO: Kryeministër tash qëndrimi i opozitës dihet që këto marrëveshje ashtu siç janë nuk do t’i votojnë. A mendoni që ka vend për një kompromis, t’i ftoni edhe një herë në një tryezë partitë opozitare për të biseduar për këto çështje?

Mustafa: Sa i përket Demarkacionit ne jemi ulur disa herë. Kryesisht jemi ulur kur kanë qenë përfaqësues ndërkombëtarë këtu, dy herë kur ka qenë komisionari (Johannes) Hahn, mirëpo gjithmonë mund të ju them se pozicionet kanë mbetur të njëjta të ngurta dhe nuk ka pasur fare gatishmëri që të lëvizet nga ana e opozitës më tutje. Sa i përket Asociacionit të Komunave Serbe, atë e ka trajtuar Gjykata Kushtetuese e cila ka dhënë opinionin e vet.

EO: Së fundi ju keni dhënë edhe një ide për fillimin e një komisioni matjen e territorit…

Mustafa: Jemi munduar të kemi një gjithëpërfshirje në komision. Po ashtu kemi dhënë bazën që komisioni të jetë komision i eksperteve, ku kemi përfshirë dhe kryetarët e komunave që kufizohen me Malin e Zi: kryetarin e Komunës së Junikut, të Deçanit, të Pejës edhe të Istogut; dhe po ashtu kemi paraparë që të jenë edhe dy banorë që na i propozon komuna e Pejës nga ajo zonë e kufirit, në mënyrë që edhe ata të jenë prezentë. Të tjerët do të jenë përfaqësues të Akademisë së Shkencave, përfaqësues të opozitës, Lëvizjes Vetëvendosje, të Aleancës, të Nismës, përfaqësues të Institutit të Gjeodezisë, pastaj përfaqësues të Institutit të Ujërave, përfaqësues të Agjencisë së Pyjeve dhe shumë institucioneve të tjera të cilat janë të ndërlidhura. Kemi paraparë dhe përfaqësues të KFOR-it, EULEX-it, pastaj të Zyrës së Bashkimit Evropian në Kosovë, të Ambasadës Amerikane që të jenë edhe ekspertët e tyre prezentë, në mënyrë që çdo gjë të jetë transparente. Objektiv i yni ka qenë që ne vetëm të sqarohemi para qytetarëve që të dijë se cili ka qenë territori i Kosovës deri me datën 25 gusht 2015 dhe cili është territori i Kosovës pas nënshkrimit të marrëveshjes, në mënyrë që të shohin se me rastin e këtij nënshkrimi të kësaj marrëveshje a ka humbur Kosova territor, ashtu siç po akuzon opozita, apo nuk ka humbur. Sepse e kemi për detyrë, unë nuk dëshiroj që nesër unë si kryeministër i vendit, ose si profesor universiteti, ose si anëtar i Akademisë, si kryetar i LDK-së, ose fundi si familjar, si njeri i këtij vendi, të dalë që e kam shitur një metër katror, ose jam pajtuar që një metër katror t’ia japim Malit të Zi për liberalizim të vizave. Asnjë metër s’ia japim.

EO: Kryeministër, kohët e fundi temë e “nxehtë” është bërë edhe çështja e ndërtimit të murit nga autoritetet serbe në veri të Mitrovicës. Të gjithë, si ju, ashtu dhe presidenti Thaçi e kryeparlamentari Veseli, po deklaroni se muri duhet të rrënohet? Pse nuk merret aksion, të shkojë inspeksioni i MMPH-së dhe ta rrënojë këtë mur?

Mustafa: Unë vetëm dëshiroj të sqaroj që për murin kurrë nuk është diskutuar në Bruksel, do të thotë nuk ka qenë pjesë e dialogut. Në Bruksel është folur për rikonstruktimin e urës dhe qëllimi i rikonstruktimit ka qenë që t’i heqin barrikadat nga ura. Ju e dini që ka pasur barrikada. Njëherë ka pasur barrikada të zallit, tani i shndërruan në barrikada të gjelbra, një lloj parku mbi urë e tjera, edhe janë pajtuar serbët. Mirëpo shndërrimi i rrugës në shëtitore nuk është në kompetencë as të qeverisë qendrore, as të Brukselit, është në kompetencë të Komunës, Kuvendit Komunal. Sepse Kuvendi i Komunës me planet rregulluese urbanistike dhe të tjera rregullon se çfarë rrugë çfarë destinimi do të ketë. Mirëpo edhe në këtë shndërrim, në asnjë rast nuk është diskutuar për mure, dhe ka qenë absurde që ne tash të themi po i heqim barrikadat tash që janë mbi urë dhe po i zhvendosim andej urës. Është një objekt pa leje dhe pa projekt. Dhe inspektorati i Ministrisë së Mjedisit ka pasur projekt ligjor që e konstaton ndërtimin e murit. Ata kanë dhënë urdhëresë që të ndërpriten punimet dhe të vazhdojë inspeksioni atje. Mirëpo ky është, të themi si ndërtim është i kategorisë së dytë, nuk i përket se i kontrollon, i mënjanon ose i lëshon masa vetëm qeveria qendrore. Është ndërtim që bien në fushëveprime të pushtetit lokal dhe për këtë arsye duhet inspektorati lokal, ose i pushtetit të Komunës Veriore të Mitrovicës të marrë masën. Sepse janë masat ligjore ndaj tyre që duhet të ndërmerren, sepse ligji parasheh se ata duhet t’i përgjigjen materialisht ose penalisht për moskryerje të detyrës. Dhe nëse nuk e bëjnë, është prapë çështje ligjore. Sepse, në këtë rast, unë dëshirojë t’ju them edhe juve edhe opinionit, se ne duhet të veprojmë sipas ligjit. Ne nuk mund të themi tash se kryeministri po bëhet një njeri i fortë, me vendime të forta, ai po jep urdhra që me nis buldozerin me rrënu murin; sepse në çdo moment kur ne vendosim për të rrënuar duhet që para saj ta shkruajmë një vendim, i cili rregullon bazën ligjore të rrënimit të murit i cili është pa leje. Po ashtu duhet të shohim se kush janë organet përgjegjëse që marrin përgjegjësi për rrënimin e tij. Ju dini se ne kemi pasur mbi 20 barrikada të tjera në veri të vendit dhe Serbia këta e ka bërë me qëllimi që të destabilizojë vendin dhe ju po e shini se ka 10 ditë që nuk merremi me send tjetër po me një mur që na e kanë vendosur serbët atje dhe me të cilin praktikisht e kanë tërhequr krejt opinionin tonë.

EO: A pritet të ndryshojë diçka në dialogun me Serbinë, pasi ajo vazhdimisht heziton t’i implementojë edhe marrëveshjet e arritura me shumë koncesione në Bruksel? Është përmendur mundësia që dialogu të vazhdojë në nivel presidentësh?

Mustafa: Unë mendoj që dialogu domosdoshmërish duhet të ndryshojë; dhe rasti i ndërtimit të murit atje flet për seriozitetin ose joseriozitetin e Serbisë në procesin e dialogut. Prandaj ky problem i murit më tepër është problem i Brukselit, problem i produktit që neve po na lind nga sjellja me obstruksion e Serbisë në këtë proces dialogu, sepse ndryshe flasim ne atje dhe ndryshe lëmë përshtypje. Mua këtu më kanë sulmuar edhe ndërkombëtarët në zyrën time se nuk po jemi bashkëpunues, nuk po jemi gjenerozë, ndërkaq “gjeneroziteti” i Serbisë po duket në ndërtimin e mureve dhe ndërtimin e barrikadave. Dhe në qoftë se ky është kriter, atëherë edhe Brukseli në bazë të këtij kriteri duhet të vendosë. Prandaj për neve është me rëndësi që të punojmë në implementim të marrëveshjeve, muri të rrënohet nga ata që e kanë ndërtuar, sepse nuk kanë pasur askund marrëveshje për ndërtim të murit. Duhet të implementohet Marrëveshja për Energjinë, të fillohet pastaj në procedura të rregullta të lidhet edhe çështja për Asociacionin e Komunave dhe zhbërja e strukturave paralele serbe. Ne jemi që në formatin e ardhshëm të dialogut të kemi përfaqësues të Zyrës së Presidentit, të Kuvendit të Kosovës, të opozitës dhe të shoqërisë civile. Ndërsa nga ana e Serbisë është çështje e tyre se kënd do ta marrin. Mirëpo kush do të përfaqësojë Kosovës në Bruksel varet nga nivelet reciproke të përfaqësimit. Por me rëndësi është që ne këtu brenda t’i kemi të sqaruara gjërat, që kur të shkojmë në Bruksel të shkojmë me qëndrime të cilat janë të harmonizuara.

EO: Një sfidë tjetër me të cilën ballafaqohet vendi ynë është edhe rreziku nga terrorizmi. Sa është real ky rrezik, apo nganjëherë sikur zmadhohet. Rasti i fundit, i dy vëllezërve kosovarë të cilët u arrestuan në Gjermani, dhe me shumë bujë nëpër medie Kosova u apostrofua si një vend që prodhon radikalistë fetarë. Në fund ata u liruan, por imazhi i Kosovës megjithatë u dëmtua?

Mustafa: Unë vlerësoj që kemi bërë një punë shumë të mirë në Kosovë kundër terrorizmit të dhunshëm, ekstremizmit. Kuvendi e ka aprovuar ligjin dhe ka parandaluar shkuarjen e njerëzve në luftëra jashtë vendit. Qeveria ka aprovuar Strategjinë Kundër Ekstremizmit dhe Terrorizmit; kemi arritur që të bashkëpunojmë me të gjithë palët e interesuara dhe me bashkësitë fetare, veçmas me komunitetin mysliman, OJQ-të, me bizneset dhe me shkollat.
Kemi arritur që vitin e fundit asnjë njeri nga Kosova të mos shkojë në ato konflikte. Nuk është as ekstremizmi as terrorizmi i shprehur në atë masë që ne të themi se jemi kryesorët. Nganjëherë, edhe në opinion, po më duket se po stërmadhohet roli i Kosovës në këtë aspekt. Më vjen shumë keq kjo që ndodhi me dy vëllezërit kosovarë në Gjermani. Më vjen shumë mirë që u vërtetua që ata s’kanë pasur dorë dhe s’kanë qenë fare të lidhur më atë veprimtari. Mirëpo, kjo na kushton shumë vetëm që kanë filluar dyshimet; ka dalë njëherë që janë dy kosovarë dhe kur lëshohet lajmi në opinion përmasa e atyre që e dëgjojnë këtë lajm janë shumë më të mëdha sesa kur mbyllet. Ne do të mundohemi që të bëjmë punën tonë maksimalisht, por ne nuk mund të përgjigjemi çfarë do të ndodhë, ne do të përgjigjemi për këtu. Policia po bën punë e shkëlqyeshme, Agjencia e Inteligjencës, po ashtu qytetarët po bashkëpunojnë mirë. Institucionet e gjyqësisë kanë marrë masa shpejt që të mos lejojnë, por të parandalojnë në mënyrë që edhe nesër ata njerëz që kthehen nga ato vende të mos rekrutojnë njerëz të tjerë për këto qëllime.

EO: Gjatë verës ishte paralajmëruar zvogëlimi i numrit të ministrive. Pse nuk u bë kjo?

Mustafa: Ne kemi biseduar me partnerët e koalicionit, me PDK-në; i kemi trajtuar edhe hapësirat ku ne mund t’i bëjmë disa tkurrje të disa ministrive në mënyrë që ato t’i lidhim. Nuk kemi hequr dorë, në qoftë se e vlerësojmë se duhet të rrisim efikasitetin e qeverisë përmes ndryshimeve të caktuara ne atë e bëjmë. Në qoftë se e bëjmë vetëm sa për të plotësuar një kërkesë të opinionit të jashtëm nuk shprehet në efikasitetin e qeverisë edhe këtë do të vlerësojmë. Unë prapë qëndroj mbrapa konstatimit tim dhe qëndrimit se kemi një qeveri të madhe dhe se Kosova nuk ka nevojë të ketë një numër të tillë të anëtarëve të qeverisë, duhet ta racionalizojmë, por është koha që të racionalizojmë tani. Një vit e gjysmë para zgjedhjeve është koha ne këtë ta bëjmë përmes ligjit për qeverisë, sepse ligji për qeverinë thotë se të caktojmë qartë se sa ministra i duhen Kosovës dhe cilat do të jenë këta ministra është çështje tjetër. Ne do të punojmë në dy këto kanale, por procesin nuk e kemi mbyllur.

EO: Gjithashtu dy ministri po funksionojnë pa ministra (e Mjedisit dhe e Integrimit). Pse po vonohet emërimi i ministrave të rinj, nuk po i gjeni njerëzit e duhur?

Mustafa: Njerëz ka, por siç duket ky fundi i vitit na ka ngarkuar më tepër me disa ngjarje të tjera. Do të thotë ne e kemi caktuar zëvendësministrin e Ministrisë së Mjedisit dhe Planifikimit Hapësinor për ushtrues detyre, kështu që aty nuk kemi ndonjë vakum. Në momentin që Partia Demokratike vjen me propozim ne do të bëjmë menjëherë. (Ferat Shala tashmë është caktuar ministër i MMPH-së – Vërejtje e Redaksisë). Po ashtu ka mbetur edhe çështja e ministrit të Integrimeve Evropiane, për të cilën edhe Bashkimi Evropian po insiston që të mbyllet. Unë mendoj që kuadro ka mjaft, por duhet që edhe në suaza të subjekteve politike, gjithmonë ka biseda që zhvillohen se kush është ai që më së shumti e meriton me qenë në atë pozitë.

EO: Para pak ditësh e shkarkuat ministrin Lubomir Mariq. Cila ishin arsyet e shkarkimit?

Mustafa: Po e them sot publikisht se po të ishte ai një ministër shqiptar qysh moti s’do të ishte ministër. Por meqenëse jemi në një situatë, ku po kemi vullnet dhe po jemi më gjenerozë sa i përket hapësirës për integrimin e komunitetit serb, duke pasur parasysh edhe rrethanat në të cilat ndodhemi jam munduar që të bisedoj disa herë me të dhe t’i bëj vërejtje që duhet të respektojë ligjin dhe Kushtetutën. Mendoj që për një kohë të gjatë, ministri Mariq edhe ka vepruar, edhe ka dhënë deklarata të cilat kanë qenë në kundërshtim me të qenit anëtar i Qeverisë së Republikës së Kosovës… I kemi thënë që çdo gjë mund ta thotë në mbledhjen e Qeverisë, si anëtar i saj, por që s’mundet të punojë këtu e të shkojë në Beograd të japë deklarata që janë kundër subjektivitetit edhe shtetëror dhe juridik të vendit. Ata janë të interesuar që ministrat e tyre të punojnë në mënyrë që të përfitojë komuniteti serb. Është bërë një zgjidhje e mirë me ministren e re Mirjana Jevtiq.

EO: Emërimi i ministres së re a është bërë në pajtim me Listën Serbe, pasi kanë lindur disa pakënaqësi?

Mustafa: Po zëra ka prej atyre që akoma nuk po kthehen në qeveri, dhe ata s’do t’i presim larg sepse edhe ata a dëshirojnë të kthehen ose jo, sepse askush nuk ka të drejtë të marrë pagë nga shteti i Kosovës dhe të mos e bëjë punën për atë pagë. Ka pasur deklarata edhe nga zyrtarët në Beograd e të cilat janë totalisht të papranueshme dhe për të cilat Bashkimi Evropian duhet të ulet dhe konstatojë sesi mundet që një (Marko) Gjuriq, si përfaqësues i Serbisë, të thotë se ata (ministrat serbë) duhet të na përgjigjen neve. Përfaqësuesit serbë janë përfaqësues të qytetarëve serbë të Kosovës jo të politikave të Beogradit. Me këtë ata po dëshirojnë të destabilizim dhe t’i mbajnë peng njerëzit. Këtë nuk do ta lejojmë.

EO: Z. Mustafa, meqë jeni dhe kryetar i LDK-së, do të donim të ju pyesnim pak edhe rreth partisë. Gjatë fushatës e keni kritikuar shumë partinë e atëhershme në pushtet, që drejtohej nga Thaçi. Por më vonë hytë në koalicion me PDK-në. A mendoni se ky koalicion do ta dëmtojë LDK-në në zgjedhjet e ardhme?

Mustafa: Tash çështja e fushatave është se çdo parti shpalos vlerat e veta dhe çdonjëri thotë që unë një punë e bëjë më mirë se tjetri; dhe po ashtu i konstatojmë punët e një qeverisje, e cila është udhëhequr nga një subjekt tjetër. Dhe unë e kam bërë atë. Natyrisht as tash s’mund të them se s’kam pasur të drejtë atëherë, por kam thënë se çfarë bën dhe çfarë nuk bën qeverisja që ka ushtruar PDK-ja. Unë kam qenë i bindur se është shumë më e dobishme që LDK-ja të marrë një pjesë të kësaj përgjegjësie dhe jo siç thotë populli nga trapazani të japë vetëm kritika, por të hyjë brenda të marrë përgjegjësi dhe të ndihmojë për ato vërejtje që kemi pasur për qeverinë t’i përmirësojmë, në këtë rast t’i përmirësojmë bashkërisht. Ka pasur anëtarë të LDK-së edhe të strukturave të larta që kanë kundërshtuar, ju e dini që ka pasur edhe deputetë që nuk më kanë votuar mua në Kuvend, mu për shkak të këtij kundërshtimi. Por unë mund t’ju them se tani situata është krejtësisht ndryshe, se anëtarësia e LDK-së si dhe qytetarët po shohin dobi prej një koalicioni të tillë dhe prej qenit në qeverisje.

EO: Së fundi në opinion doli një sondazh, sikur u tha me të rinjtë, dhe aty LDK-ja del partia e tretë? A iu besoni sondazheve të këtilla që bëhen nga organizata joqeveritare?

Mustafa: Mendoj që shoqëria civile ka të drejtë të bëjë punën e vet. Problem themelor në Kosovë është se nuk ka shoqëri civile të depolitizuar. Kemi një shoqëri civile, e cila vetëm duhet me pritë pak kohë, për me e pa se në cilën parti po hyn, a po shkojnë në Vetëvendosje, në PDK, apo po shkojnë në LDK. Në LDK nuk kemi pasur shumë që kanë ardhur. Sondazhi për mua janë zgjedhjet. Në zgjedhje kur të dalim, atëherë e shohim se cili është rezultati konkret. Unë dyshoj që qytetarët e Republikës së Kosovës e përkrahin dhunën, i përkrahin partitë që demonstrojnë dhunë, demonstrojnë kallje, molotov, sulm kundër institucioneve… Kush ka përmbushur detyrime ose zotime ndaj qytetarëve është çështje tjetër, për të cilën ne do të kemi përgjigjen në zgjedhjet lokale në vjeshtë të vitit të ardhshëm dhe në zgjedhjet qendrore në qershor të vitit 2018.

EO: A jeni të gatshëm nëse zgjedhjet do të mbaheshin vitin e ardhshëm?

Mustafa: Ne e kemi këtë mandat legal dhe legjitim, të themi si koalicion qeverisës që të qeverisim vendin deri në qershorin e vitit 2018. Asnjë arsye nuk kemi që të shkojmë përpara në zgjedhje. Ju e dini se opozita nga dita e parë e qeverisë ka kërkuar të ketë zgjedhje të reja. I bëmë dy vite, prapë po kërkojnë; do të kërkojnë deri më 9 ose 10 qershor të vitit 2018, por unë them se s’do të ketë zgjidhje. Duhet të ketë shumë arsye, sepse ne vetëm do të humbin një vit kot pa ndryshime dhe do të vijnë në një situatë në të cilën jemi sot s’do të kemi ndryshime shumë të mëdha, kush do të renditet i pari, kush i dyti është çështje tjetër. Mirëpo partitë të cilat janë më serioze për mua janë këto dy parti të cilat po e qeverisin vendin.

EO: A keni vija të kuqe ndaj ndonjë partie për koalicion të ardhshëm?

Mustafa: Nuk kemi, s’kemi arsye me pas vija të kuqe, por natyrisht në gjithmonë do të shohim se programi qeverisës me cilën parti mund të bëhet më lehtë dhe pra kush janë më pro-evropianë dhe euroatlantikë. Pra ne gjithmonë duhet të bashkëpunojmë më ato parti të cilat e mbajnë këtë kusht. Sepse duhet të anëtarësohemi në Bashkimin Evropian, duhet të anëtarësohemi në NATO, duhet të anëtarësohemi në institucionet ndërkombëtare në mënyrë që të jetë sa më e qartë se me cilat parti politike mund të bëhet puna sa më shpejt që të jemi në harmoni me atë që Bashkimi Evropian kërkon prej nesh.

EO: Kryeministër kohëve të fundit kemi pasur pritje të gjatë të mërgimtarëve nëpër pikat kufitare. Pse po ndodhin këto maltretime?

Mustafa: Po maltretimet janë çështje të papërgjegjësisë së kufitarëve, sidomos nga ana serbe, sepse tash me qëllim krijojnë vonesa të tilla për të krijuar pakënaqësi të qytetarëve. Ne do t’i diskutojmë këto vërejtje, sepse s’mund të ulemi me ta që të diskutojmë çdo gjë në Bruksel, që ata të sillën në mënyrë korrekte dhe që qytetarët të mos pësojnë për arsye të qëndrimeve të tyre politike.

Intervistuan: Bashkim Bekolli & Kaltrina Zymberi
Kamera: Besnik Latifi & Liridon Zjenullahu