Dukej diçka e pamundur, por Rafael Nadal ia doli të fitojë titullin e tij të 11-të në turneun Masters të Montekarlos, duke u konfirmuar si mbreti i fushave me dhe në tenis.

Në finalen e së dielës, numri një i botës mposhti me lehtësi Kei Nishikorin dhe tani do të kërkojë që të fitojë për të 11-n herë edhe dy turne të tjerë: atë të Barcelonës dhe Roland Garros, për t’u bërë përfundimisht një legjendë e këtij sporti.

Nadal e ka fituar turneun Masters të Montekarlos nga 2005-2012 dhe në periudhën 2016-2018. Vetëm katër herë nuk ka mundur spanjolli të largohet nga Principata me trofe.

Në vitin 2003 u eliminua në 1/8 e finaleve nga Guillermo Coria, në 2013 humbi në finale ndaj Novak Djokovic, në 2014 u eliminua në çerekfinale nga Ferrer dhe në 2015 u mund në gjysmëfinale nga Djokovic.

Nga 11 triumfet në Principatë, pesë tituj 31-vjeçari i ka fituar pa humbur as edhe një set.

Statistikat e Nadalit në fushat me dhe’ janë të frikshme: tenisti nga Majorka ka fituar 36 sete në këtë sipërfaqe. Nga 76 titujt e fituar në karrierën e tij, 54 i ka siguruar pikërisht në fushat me dhe’.

Për më tepër, në këtë lloj fushe Nadal ka një bilanc prek 396 ndeshjesh të fituara dhe 35 të humbura, që do të thotë 91.9% e ndeshjeve të fituara, duke e lënë pas Bjorn Borgun, i cili ka bilanc me 251 fitore e 41 humbje, ose 86% e ndeshjeve të fituara.

Për vitin 2018, Nadal ka luajtur 12 ndeshje, nga të cilat ka humbur vetëm një, atë ndaj Cilic në çerekfinalen e Australian Open.

Rafael Nadal e ka rimarrë tashmë vendin e parë në renditjen ATP dhe kjo do të jetë java e 171 e tij në këtë pozicion, duke kaluar John McEnroe, i cili ka mbetur në kuotën e 170 javëve si numri një i botës.

Diferenca me Federer të vendit të dytë është vetëm 100 pikë dhe nëse Nadal nuk do të fitojë në Barcelonë, ku fitoi vitin e kaluar, atëherë do t’ia lërë zviceranit vendin e parë. /TCh/