Ndërtimtaria, si një ndër sektorët më të zhvilluar në vend, ballafaqohet me mungesë të personelit të kualifikuar, përfshirë persona me shkathtësi në shitjen e banesave.

Për këtë arsye, kompania ndërtuese “Pozhegu Brothers” ka filluar me trajnimin e të rinjve, të cilët do të aftësohen për tregun e punës.

Trajnimet me temën “Zhvillimi i shkathtësive në shitje dhe menaxhim të sektorit të shitjeve” kanë nisur sot dhe do të vazhdojnë deri më 27 shtator. Ato do të jenë falas për të gjithë kandidatët, të cilët janë kryesisht të rinj.

Qemajl Pozhegu, pronar i kompanisë ndërtuese “Pozhegu Brothers”, thotë se pas trajnimeve këta të rinj do të jenë të gatshëm për të hyrë menjëherë në tregun e punës.

“Kandidatët prezent pritet të aftësohen në aspektin e shitjes dhe potencialisht dikush prej tyre të punësohet në kompaninë tonë. Por qëllimi është që t’i aftësojmë të rinjtë e t’i certifikojmë e cila do t’iu shërbejë jo vetëm për mundësi të punësimit në kompaninë tonë, por edhe në kompanitë e tjera.”

Ai tha se duan që të kontribuojnë në fushën e përgjegjësisë sociale.

“Qëllimi është që t’i japim diçka komunitetit, meqenëse shohim se njerëzit e rinj po kanë problem me gjet punë të reja, edhe në momentin që aplikojnë nëse s’kanë përvojë pune automatikisht po janë jashtë tregut të punës.”

Ky ndërtues ankohet se Komuna e Prishtinës, nuk po bën mjaftueshëm për ndërtimin e infrastrukturës nëpër vende ku po ndërtohen objekte kolektive banimi.

Uragan Alia, nga kompania “Simplicate LLC”, ka thënë se mënyra se si është përfshirë programi ka përfshirë edhe pjesën teorike.

“Kemi kombinuar teori praktikë, pastaj vizita në pjesën e segmentit të industrisë ndërtimit. Kemi vizita te kompania ndërtuese ‘Pozhegu Brothers’, në ambiente ndërtimi, në ambiente ku janë ndërtuar dhe ato që janë në ndërtim e sipër”, tha ai.

Ejup Gojnoci, nga Oda Ekonomike Gjermane Kosovare, ka theksuar se fatkeqësisht në Kosovë nuk ka shitës profesional.

“Më rëndësi është që do të mësoni, dhe ju do ta bëni një klientë të kënaqur. Ky do të jetë hapi kryesor në punën e juaj të përditshme. Për ta bërë një klient të kënaqur duhet t’i ofroni shërbimin të cilin ai ka nevojë, për ta bërë këtë duhet ta ndërtoni vetëbesimin që është çelësi kryesor…”, ka thënë Gojnoci.