Kryeministri i Australisë, Scott Morrison, ka marrë vaksinën kundër koronavirusit sot, ndërsa shteti po përgatitet për vaksinimin e popullatës në ditët në vijim, raporton BBC.

Morrison është vaksinuar në prani të kamerave sot, për të ndihmuar që të rritet besimi i popullatës ndaj vaksinave anti-COVID.

Vaksinimi zyrtarisht në Australi do të nisë të hënën dhe së paku 60 mijë doza pritet të jepen javën e ardhshme.

Të shtunën, një grup i vogël i protestuesve anti-vaksinim janë mbledhur për të protestuar kundër kësaj fushate.

Morrison ka qenë pjesë e një grupi të vogël të personave që është vaksinuar të dielën, së bashku me disa punonjës shëndetësorë dhe rezidentë në shtëpinë e kujdesit.

“Nesër nisë programi ynë i vaksinimit, kështu që sot duam të dëshmojmë se është e sigurt dhe se është e rëndësishme dhe duhet të nisim të vaksinojmë ata që janë më të cenueshëm dhe punonjësit në vijën e frontit”, ka thënë Morrison.

Personi i parë që është vaksinuar në Australi, ishte 85-vjeçarja Jane Malysiak.

Vaksinimi në Australi fillimisht do të nisë me vaksinën e Pfizerit, që ka marrë aprovimin. Po ashtu është dhënë më herët këtë javë edhe aprovimi për përdorim të vaksinës së AstraZenecas/Oxfordit.