Në mënyrë solemne sot është vendosur gurthemeli për ndërtimin e objektit-aneksit të SH.M.U. “Kongresi i Manastirit”, në Gllamnik, ku do të ndjekin mësimet nxënësit me nevoja të veçanta.

Projekti i ndërtimit të këtij objekti-aneksi shkollor financohet nga Shoqata “Kinderaugen” e qytetit Hude i Gjermanisë.

Në prani të qytetarëve dhe mësimdhënësve të kësaj shkolle, gurthemelin për ndërtimin e objektit e kanë vendosur Agim Blakçori – drejtor i Drejtorisë së Arsimit në Podujevë, Bejtush Fazliu – përfaqësues i Shoqatës “Kinderaugen” dhe Ajet Ajeti – drejtor i shkollës “Kongresi i Manastirit”.

Blakçori tha se vlerëson iniciativën e shoqatës gjermane për ndërtimin e këtij aneksi në shkollën “Kongresi i Manastirit”, në të cilën i ndjekin mësimet nxënësit me nevoja të veçanta.

Ndërsa, përfaqësuesi i shoqatës “Kinderaugen”, Bejtush Fazliu, tha se ndjehet i lumtur që po kontribuojnë në krijimin e kushteve më të mira për mësim, për këtë kategori nxënësish.

Edhe drejtori i shkollës, Ajet Ajeti, u shpreh i lumtur për fillimin e realizimit të këtij projekti dhe falënderoi Shoqatën “Kinderaugen” për investimet që po bën në këtë shkollë.

Objekti, në të cilin do të ndjekin mësimet 19 nxënës me nevoja të veçanta, do të ketë dy dhoma mësimi dhe pritet të jetë i gatshëm për vitin shkollor 2018/19.

Ndërtimi i këtij objekti nuk është donacioni i parë i Shoqatës gjermane “Kinderaguen” për shkollën e “Kongresi i Manastirit”. Kjo shoqatë në vitin 2016 ka financuar ndërtimin e këndit të lojërave për nxënësit e kësaj shkolle, kurse vitin e kaluar ka dhuruar pajisje didaktike.