Agjencia Kosovare për Efiçiencë të Energji ia ka kaluar një milion euro Fondit Kosovar për Efiçiencë të Energjisë për zhvillimin e projekteve të Efiçiencës së Energjisë, raporton Ekonomia Online.

Ministri i Ekonomisë dhe Ambientit, Blerim Kuçi, tha se është më rëndësi që këto mjete të nisin të shfrytëzohen sa më shpejt, duke e konsideruar këtë si mundësi për zhvillim ekonomik.

Kuçi u shpreh se Fondi i Kosovës për Efiçiencë të Energjisë ka në dispozicion rreth 17 milionë euro dhe nga ky moment është funksional për t’i zbatuar politikat e veta dhe për të bërë realizimin e projekteve sipas planifikimeve që kanë bërë.

“Është me rëndësi që këto mjete sa më shpejt të hyjnë në veprim dhe zbatim më synimit të rritjes së zhvillimit ekonomik, ku përfitues të këtij fondi nuk janë vetëm ata faktik por edhe ndërmarrjet private. Ndarja e mjeteve sot është rëndësishme ngase do të mundësojë realizimin sa më të shpejtë të projekteve të cilat janë duke u zhvilluar”, tha ministri Kuçi.

Ndërsa nga ana e tij Kryeshefi i Agjencionit për Efiçiencë të Energjisë, Arsim Kuliqi tha se Kosova është në rrugë të mirë në zbatimin e masave të efiçiencë së energjisë gjë e dëshmon edhe nënshkrimi i kësaj marrëveshje.

“Në mbështetje të FKEE-së Qeveria e Republikës së Kosovës është zotuar që për tri vite radhazi të mbështes FKEE-në me nga 1 milion euro, ku në këtë vit edhe pse kemi pasur shkurtim te buxhetit për 25% subvencionimi për FKEE-në ka qenë i pa prekshëm nga Qeveria”, u shpreh Kuliqi

Ndërkaq drejtori i Fondit të Kosovës për Efiçiencë të Energjisë, Lum Mita potencoi rëndësinë që ka fondi në transformimin e ndërtesave publike si në nivelin qendror po ashtu edhe në atë lokal, si dhe në ndërtesa të sektorit privat dhe falënderoi ministrin Kuçi për mbështetjen e ofruar për të shtyrë përpara projektet që do të na ofrojnë Evropën, raporton EO.

Qeveria e Republikës se Kosovës është garantuese e grantit prej 9.6 milionë euro dhe kredisë të Bankës Botërore prej 5 milionë.