Rozafë Koliqi ka ngritur dy padi ndaj Universitetit të Prishtinës, e ku rektorati akuzohet për shkeljen e Statutit dhe kritereve të konkursit për pranimin e stafit akademik gjatë vitit 2015

Dy padi ndaj Universitetit të Prishtinës janë dorëzuar në Gjykatën Themelore në Prishtinë për shkak të shkeljes së Statutit dhe kritereve të konkursit për pranimin e stafit akademik në vitin 2015.

Padia e parë ndaj UP-së është dorëzuar në Gjykatë më 7 shkurt 2017 në emër të Rozafa Koliqit për moszgjedhjen e saj asistente në Fakultetin e Mjekësisë, përkundër që kishte plotësuar kriteret e parapara me Statut dhe konkursin publik të shpallur nga UP-ja.

Ndërsa, padia e dytë ndaj UP-së figuron më 21 shkurt 2017 po nga e njëjta paditëse lidhur me largimin nga puna, nga pozita për të cilën Koliqi përveçse nuk ka marrë vendim në përputhje me ligjet në fuqi dhe rregulloret e brendshme të UP-së, është konstatuar edhe baza e gabuar faktike dhe është shfaqur diskriminim i drejtpërdrejtë.

Doarsa Kica, juristja e shoqërisë së avokatëve “Sejdiu&Qerkini”, ka konfirmuar për gazetën se janë ngritur dy padi ndaj Universitetit të Prishtinës (UP) “Hasan Prishtina”.

“Lidhur me rastin e klientes Rozafë Koliqi ne kemi hartuar dy padi të cilat i janë dorëzuar Gjykatës Themelore në Prishtinë”, konfirmon ajo.

Kica ka thënë se padia e parë kundër UP-së ka të bëjë me moszgjedhjen e Koliqit në pozitën në të cilën ka aplikuar, përkundër kredencialeve më të mira nga kandidati i pranuar. (Zeri)