Presidentja e Republikës së Kosovës, Vjosa Osmani ka marrë përgjigje pozitive nga përfaqësuesit e BE-së lidhur me kërkesën për monitorimin e zgjedhjeve lokale.

Një kërkesë të tillë, Presidentja Osmani e ka bërë në letrën e dërguar më 18 qershor 2021, në adresë të kryetarit të Parlamentit Evropian, David Sassoli, si dhe Përfaqësuesit të Lartë të BE-së për Politikë të Jashtme dhe Siguri, Joseph Borrell. Që të dy zyrtarët e lartë të BE-së i janë përgjigjur pozitivisht kërkesës së Presidentes Osmani.

Për dallim nga zgjedhjet e fundit parlamentare, në të cilat Misioni i BE-së për vëzhgimin e zgjedhjeve është përbërë nga një numër i vogël ekspertësh, në zgjedhjet lokale të vitit 2021, BE-ja do të jetë prezentë me mision të plotë të vëzhgimit të zgjedhjeve në Republikën e Kosovës deri në certifikimin e rezultatit zgjedhor.

Në njoftimin thuhet se presidenti i Parlamentit Evropian, Sassoli, në letrën dërguar Presidentes Osmani më 13 korrik e ka konfirmuar gatishmërinë e Parlamentit Evropian për të marrë pjesë në monitorimin e zgjedhjeve në Republikën e Kosovës, si dhe fillimin e menjëhershëm të procedurave përgatitore për këtë proces.

Ndërkaq në letrën e Josep Borrell, të datës 17 gusht, bëhet e ditur se pasi që Parlamenti Evropian t`i nominojë përfaqësuesit e vet, Përfaqësuesi i Lartë i BE-së do ta emëroj Shefin e Misionit, i cili bashkë me ekipin e ekspertëve do të arrijnë në Republikën e Kosovës gjatë javëve në vijim. 

Deklarata e Ambasadorit Tomáš Szunyog, shef i Zyrës së BE -së / Përfaqësues Special i BE -së në Kosovë:

Sot, kam ndarë letrën e Përfaqësuesit të Lartë i BE -së / Nënkryetarit të Komisionit Evropian  Josep Borrell me Presidenten e Kosovës Vjosa Osmani duke informuar atë se, pas ftesës së saj, Përfaqësuesi i Lartë ka vendosur të vendosë një Mision të Vëzhgimit të Zgjedhjeve të BE -së për zgjedhjet lokale të Kosovës17 tetorit 2021.

Përfaqësuesi i Lartë ka falenderuar Ministrinë e Punëve të Jashtme të Kosovës dhe Komisionin Qendror të Zgjedhjeve për përkushtimin dhe shpejtësinë me të cilën ata kanë punuar për të rënë dakord dhe nënshkruar një marrëveshje administrative që lehtëson vendosjen e Misionit.

Përfaqësuesi i Lartë Borrell ka shprehur besimin se raporti përfundimtar i Misionit të Vëzhgimit të Zgjedhjeve do të ndihmojë në mbështetjen e përpjekjeve të ardhshme të nevojshme për reformën zgjedhore duke adresuar rekomandimet e mbetura të vëzhgimit të zgjedhjeve të BE -së. Ai i ka dëshiruar Presidentes mbajtje të suksesshme të zgjedhjeve.