Në Bibliotekën Kombëtare të Kosovës është hapur ekspozita e përbashkët me punime artistike të nxënësve nga Kosova dhe Shqipëria, raporton Ekonomia Online.

Kjo ekspozitë, e organizuar nga Ministria e Arsimit për nder të 15-vjetorit të pavarësisë së Kosovës, përmban 107 punime shkollore dhe do të qëndrojë e hapur deri më 1 mars.

Ministrja e Arsimit, Shkencës, Teknologjisë dhe Inovacionit, Arbërie Nagavci, tha se fryma e lirisë shihet qartë në këto punime të nxënësve shqiptarë e se arti i ka bashkuar ata në këtë ekspozitë.

Ajo tha se si ministre e Arsimit ka këmbëngulur që bashkëpunimi ndërmjet Kosovës dhe Shqipërisë të intensifikohet sa më shumë.

“Është kënaqësi e veçantë që të jem bashkë me ju në këtë ngjarje të bukur dhe të rëndësishme. Është kënaqësi që sot na ka mbledhur arti nga dy anët e kufirit shqiptar me rastin e 15-vjetorit të pavarësisë”.

“Ky brez i nxënësve të lindur pas shpalljes së pavarësisë, jeni me fat që po rriteni në liri. Fryma e lirisë shihet qartë në këto punime. Ministria e Arsimit ka qenë dhe do të mbetet një krahë i fortë ndaj të rinjve. Është një kënaqësi e veçantë që kjo i solli nxënësit nga të dy vendet. Me dëshirën vëllazërore, së bashku me ministren e Arsimit të Shqipërisë, kemi hedhur themelet për një intensitet edhe më të madh për bashkëpunim”, tha ajo.

Ndërsa, Hasan Muqa, drejtor i Drejtorisë rajonale të arsimit parauniversitar të qytetit të Lezhës, tha se këta nxënës me punimet e tyre janë duke përçuar mesazhin e vazhdimësisë.

“Gjithçka keni punuar e keni punuar me duar të arta. Në vizatimet e juaja ndjehet aroma e lirisë, me ngjyrat e tyre ndjehet krenari, dhe nga ana tjetër përçoni mesazhin e vazhdimësisë”, tha ai.

Elsa Berisha nxënëse nga Shkolla “Asdreni” në komunën e Pejës tha se punimi saj tregon gëzimin e saj për shpalljen e pavarësisë.

“Në kemi bërë punime për 17 Shkurtin, këtu kemi paraqitur ide për të uruar Pavarësinë. Unë e kam bërë një punim që tregon gëzimin për shpalljen e pavarësisë edhe kam shprehur dashurinë ndaj Kosovës”, tha ajo

Ndërsa, Rrezarta Gjileshi, nxënëse nga Dibra nga Gjimnazi “Fiqri Dine” tha se punimi i saj kërkon që plisi të jetë e mbrojtur nga UNESCO si pjesë e trashëgimisë botërore.

“E fitova çmimin e parë në konkursin në Dibër për ta përfaqësuar në Prishtinë. Me këtë punim doja që si xhubleta edhe plisi të jenë pjesë e UNESCO-s. Është hera e parë për mua dhe ndjehem shumë e kënaqur”, tha ajo.