Rritja e ngadaltë, pasiguria e lartë dhe nivelet në rritje të pabarazisë duhet të nxisin krijuesit e politikave të ndërmarrin veprime urgjente për të arritur rritje më të fortë, më të qëndrueshme dhe më gjithëpërfshirëse. Kështu thuhet në raportin vjetor të Organizatës për Bashkëpunim dhe Zhvillim Ekonomik.

Raporti “Going for Growth 2019” thekson se dobësimi i rritjes vjen në një kohë kur globalizimi, dixhitalizimi, plakja e popullsisë dhe degradimi i mjedisit janë forcat kryesore që formojnë zhvillimet ekonomike.

“Për të menaxhuar më mirë këto trende, qeveritë duhet të zgjedhin me kujdes, të përgatisin, të japin përparësi dhe të zbatojnë reforma strukturore specifike për vendin që nxisin rritjen afatgjatë, përmirësojnë konkurrencën dhe produktivitetin, krijojnë vende pune dhe sigurojnë një mjedis më të pastër dhe mundësi të barabarta për të gjithë”, vë në dukje raporti, përcjell Telegrafi.

Ky raport shpalos prioritetet kryesore të reformës strukturore në 46 ekonomitë vendeve anëtare të OECD dhe jashtë OECD-së. Po ashtu, në raport tregohen për një ritëm zhgënjyes të reformave gjatë periudhës 2017-2018, duke gjetur pak shenja të rimarrje nga ritmi tashmë modest i reformës i vërejtur në dy vitet e mëparshme.

“Ndërsa rritja po ngadalësohet dhe teknologjitë e reja po transformojnë me shpejtësi ekonomitë tona, është urgjente të vazhdohet me përpjekjet për reforma për të nxitur rritjen gjithëpërfshirëse dhe të qëndrueshme. Politikëbërësit duhet të përqendrojnë përpjekjet e tyre për të nxitur rritjen, për të rritur barazinë e mundësive dhe gjithëpërfshirjes dhe për të përmirësuar qëndrueshmërinë mjedisore. Rekomandimi ynë kryesor shtrihet përtej G7-së, të gjitha ekonomive OECD dhe jo-anëtare: koha për reforma është tani, për jetë më të mirë sot dhe për gjeneratat e ardhshme”, është shprehur sekretari i përgjithshëm i OECD, Angel Gurría.

Ministri francez i Financave, Bruno Le Maire, shtoi se, “Sigurimi i rritjes së fortë, gjithëpërfshirëse dhe të qëndrueshme është një sfidë për të gjitha vendet e G7-së. Në Francë e marrim këtë shumë seriozisht, siç dëshmohet nga tregu i punës, arsimi dhe reformat tatimore të miratuara nga qeveria jonë vitet e fundit për të përmirësuar konkurrencën dhe për ta transformuar ekonominë përballë tranzicionit ekologjik dhe dixhital. Në emër të qeverisë, ne do të vazhdojmë të ndjekim reformat dhe të investojmë në inovacione, që është çelësi për rritjen e nesërme”.

OECD është një organizatë ndërqeveritare ekonomike me 36 vende anëtare, për të stimuluar progresin ekonomik dhe tregtinë botërore. Është themeluar në vitin 1961.