Presidentja e Kosovës, Vjosa Osmani, gjatë një bashkëbisedimi në një universitet në Berlin, ka deklaruar se Bashkimi Evropian duhet ta shohë Ballkanin Perëndimor si potencial dhe jo si barrë.

Ajo theksoi se procesi i zgjerimit të BE-së duhet të trajtohet si domosdoshmëri strategjike për vetë bllokun, e jo të ndikohet nga interesat e vendeve të veçanta anëtare.

Osmani u shpreh në favor të heqjes së fuqisë së vetos brenda Këshillit të BE-së, duke theksuar se shpesh një vend i vetëm ka bllokuar vendimet e përbashkëta.

Ajo theksoi se rajoni ofron potencial njerëzor, ekonomik dhe të sigurisë, ndërsa afrimi i tij me BE-në do të sillte më shumë paqe e stabilitet në kontinent.

Presidentja theksoi gjithashtu se Kosova e ka përshtatur plotësisht politikën e saj të jashtme me atë të BE-së, përfshirë vendosjen e sanksioneve ndaj Rusisë, duke kritikuar vendet që nuk kanë vepruar njësoj, si Serbia. “Nuk mund të ulesh në dy karrige njëherësh, nuk duhet të ketë një zonë gri,” porositi ajo.