Presidentja Vjosa Osmani ka pritur në takim Përfaqësuesin Special të Bashkimit Evropian, Miroslav Lajčák, raporton Ekonomia Online.

Në takim u diskutua për zhvillimet e fundit në procesin e dialogut me Serbinë, me ç’rast presidentja Osmani ka ritheksuar se Kosova mbetet e angazhuar për një proces, i cili i kontribuon paqes afatgjate, sigurisë dhe prosperitetit të qëndrueshëm në rajon, njofton Klan Kosova.

Ajo potencoi se aneksi i zbatimit të marrëveshjes bazë, të dakorduar në Bruksel, duhet të jetë në frymën e parimeve të miratuara në Kuvendin e Republikës së Kosovës, gjegjësisht, paprekshmërisë së sovranitetit, integritetit territorial, kushtetutshmërisë dhe funksionalitetit të shtetit të Kosovës.

Tutje, Osmani ka thënë se Kosova mbetet palë konstruktive në procesin e dialogut dhe e koordinuar me partnerët e saj, ndërsa ka ritheksuar se fjalën përfundimtare rreth një marrëveshjeje duhet ta thotë Kuvendi i Kosovës në përputhje me procedurat kushtetuese.

Presidentja gjithashtu ka mirëpritur vendimin e sotëm të Këshillit të Bashkimit Evropian ku në mënyrë unanime është miratuar e drejta e qytetarëve të Kosovës për të udhëtuar në shtetet e zonës Schengen pa vizë.

Kujtojmë se Lajçak pas vizitës dyditore në Prishtinë do të shkojë edhe në Beograd. Kjo vizitë vjen pas takimit të 27 shkurtit në Bruksel mes kryeministrit, Albin Kurti dhe presidentit serb, Aleksandar Vuçiq, të cilët e pranuan Propozimin e Bashkimit Evropian me mbështetjen e Francës dhe Gjermanisë për normalizimin e raporteve mes dy palëve.

Po ashtu, raundi i ri i dialogut është caktuar të mbahet më 18 mars në Ohër të Maqedonisë së Veriut, dhe sipas BE-së, qëllimi kryesor tani është që palët të arrijnë pajtim rreth një plani si dhe të modaliteteve për zbatimin e propozimit evropian.