Presidentja Vjosa Osmani ka deklaruar, në një konferencë të përbashkët me homologun e saj bullgar, Rumen Radev, se vetëm anëtarësimi në NATO i të gjitha shteteve të Ballkanit mund të sjell paqe në rajon, raporton Ekonomia Online. Sipas saj, çdo veprim tjetër u jep hapësirë keqdashësve për ta destabilizuar rajonin dhe botën.

Pas takimit me Radev, Osmani theksoi para gazetarëve se Bullgaria ka dhënë kontribut të jashtëzakonshëm në shtet-ndërtimin e Kosovës.

“Bullgaria ka dhënë kontribut në çdo etapë në shtet-ndërtimin e Kosovës, si pjesëmarrje në KFOR, me njohje të shtetit të Kosovës e kështu më radhë dhe në fund me përkrahje duke votuar pro anëtarësimit të Kosovës në Këshillin e Evropës”.

“Vetëm anëtarësimi në NATO i gjithë shteteve të Ballkanit mund të sjell paqe në tërë rajonin tonë. Udhëheqja e guximshme e aleatëve tanë janë të nevojshme për të përshpejtuar vendet demokratike në BE dhe NATO, sepse çdo hezitim u jep hapësirë keqdashësve për ta destabilizuar rajonin dhe botën”.

“Për ne raporti me Bullgarinë ka qenë i një rëndësie të veçantë dhe së bashku mund ta ruajnë paqen jo vetëm në Kosovë por edhe në rajon”, u shpreh Osmani, teksa e quajti Bullgarinë si shtet aleat.