Franca perëndimore po përballet me një “apokalips të të nxehtit”, kanë paralajmëruar ekspertët, pasi temperaturat ekstreme vazhdojnë të godasin pjesën më të madhe të Evropës.

Temperaturat mund të arrijnë nivele rekorde në 15 rajone të jugperëndimit, me zjarrfikësit që po luftojnë me flakët dhe mijëra persona të detyruar të evakuohen, raporton BBC.

Zjarret në Francë, Greqi, Portugali dhe Spanjë kanë shkatërruar mijëra hektarë tokë dhe kanë detyruar mijëra banorë dhe pushues të largohen.

Kjo është vala e dytë e të nxehtit që përfshin pjesë të Evropës brenda javësh. Shkencëtarët fajësojnë ndryshimet klimatike dhe parashikojnë episode më të shpeshta dhe intensive të motit ekstrem, si valët e të nxehtit dhe thatësira.

Në Francë në pyllin Landes, në rajonin jugperëndimor Aquitaine, temperaturat mund të arrijnë në mbi 42 gradë Celzius , sipas parashikuesit Olivier Proust.

Dhe Brittany, e cila deri vonë ka shpëtuar nga të nxehtit të madh, mund të regjistrojë temperatura deri në 40C (104F), thonë ekspertët, që do të ishte një rekord për rajonin, shkruan The Guardian, transmeton Klankosova.tv.

Nga e diela vonë, zjarret në Gironde, të cilat kanë shpërthyer që nga e marta, kishin shkatërruar tashmë 13,000 hektarë të nxitur nga erërat e forta dhe duke detyruar evakuimin e 16,200 pushuesve, thanë zyrtarët e shërbimit zjarrfikës.

Zjarret në Portugali janë vënë kryesisht nën kontroll, pavarësisht se temperaturat atje arritën 47 gradë Celsius të enjten – një rekord për korrikun.