Avokati i Popullit Hilmi Jashari bëri me dije se kanë pasur shumë ankesa nga qytetarët e vendit për të drejtën në pension kontributpagues, si dhe të drejtën në shfrytëzimin e pensioneve të tjera të aplikueshme në Kosovë.

“Ne kemi bërë një raport, të cilin ia kemi dërguar MMPS-së. Ka p.sh persona që kanë paguar për pleqëri, kurse tani marrin vetëm një pension p.sh të veteranit të luftës. Ndërkaq MMPS-ja ua ka ndalë pensionin e pleqërisë që është e drejtë e tyre elementare. Për këtë ne kemi reaguar dhe kërkojmë të ndryshohet ligji”, i tha ai sot RTK.

Sipas tij pensioni kontributpagues është pronë e çdo individi. “Në këtë pjesë janë atakuar kategoritë e dala nga lufta, pra veteranët e luftës. Ka qytetarë që u takojnë të dy pensionet, por qytetarët po zgjedhin pensionin më të lartë”, theksoi ai.

Jashari tha se edhe Strasburgu ka vendosur që pensioni kontributpagues është pronë e çdo individi dhe institucionet e Kosovës duhet të respektojnë atë.

“Ne presim që institucionet e Kosovës të reagojnë dhe të pranojnë rekomandimet tona. Ne presim ndryshim. Zgjidhja është në dorë të Kuvendit të Kosovës. Ne presim nga ministri i Punës të zgjidhë këtë problem”, tha ai.

Sipas tij nuk ka shifra zyrtare se sa qytetarë janë atakuar nga vendimi për mos lejim të marrjes së dy pensioneve.